АОКА қошидаги махсус штабда 7 апрель, сешанба куни, бўлиб ўтган онлайн брифингда Ташқи ишлар вазирлиги ахборот хизмати раҳбари Авазбек Ҳожиматов чет элда таҳсил олаётган ўзбекистонлик талабаларнинг Ўзбекистонга қайтарилиши ҳақидаги саволга жавоб қайтарди.
Вазирлик вакилининг айтишича, Ўзбекистонга қайтиш истагини билдирган хориждаги талабалар рўйхатлари шакллантирилиб, маълумотлар чартер рейсларни ташкиллаштириш билан боғлиқ масалаларни кўриб чиқиш учун Республика махсус комиссияси, масъул вазирлик ва идораларга киритилган.
«Қатъий карантин чоралари жорий қилинган, вақтинча мамлакатга кириш-чиқиш тўхтатилган бир шароитда чет элдаги талабалардан шахсий гигиена қоидаларига амал қилишларини, яшаб турган жойларини тарк этмасликларини, ўзлари жойлашган давлатларининг расмий идоралари томонидан жорий қилинган тартибларга риоя қилишларини сўраймиз», — дея талабаларга мурожаат қилган Авазбек Ҳожиматов.
ТИВ ахборот хизмати раҳбарининг қўшимча қилишича, ҳозир хорижда бўлиб турган фуқаролар, жумладан, талаба ёшларнинг мурожаатларига ўз вақтида жавоб қайтариш, уларнинг ҳуқуқ ва манфаатларини ҳимоя қилиш учун чет элдаги барча элчихоналар ва консуллик муассасалари ҳузурида тезкор штаблар ҳам ишлаб турибди.
Ташқи ишлар вазирлиги вакили брифингда хориждаги фуқаролар ҳақидаги хабарларни текширмасдан тарқатмасликни сўради.
«Фейк хабарлар кўп, шунинг учун турли сайтлар ва интернет нашрларида бирор маълумотни тарқатишдан олдин уни расмий ресурслардаги ахборотлар орқали текшириб кўриш муҳим», — деди Авазбек Ҳожиматов.
Ҳожиматов айрим шахслар томонидан хориждаги фуқаролар орасида қийин аҳволга тушиб қолганлиги учун дипломатик ваколатхоналардан ёрдам сўралган турли мурожаатларни тарқатиш ҳоллари кўпайиб бораётганини қайд этган ва бу каби маълумотларни тарқатаётган шахслар билан боғланиш, воқеа жойига бориб муаммони аниқлаш ва чет эл ваколатли идоралари билан алоқа ўрнатиш учун элчихона ҳамда консулхоналар ходимлари катта ресурс ва кўп вақт сарфлаётганини таъкидлаган.
«Шунча вақт сарфлаб ўрганилганда эса хабар ёлғон бўлиб чиқяпти. Мурожаат тарқатган фуқаро билан учрашув чоғида у асоссиз ахборот тарқатганлиги учун узр сўраяпти, холос», — деган ТИВ вакили.
Изоҳ (0)