АОКА штабида Ташқи ишлар вазирлиги ахборот хизмати раҳбари Авазбек Ҳожиматов Россияда меҳнат қилаётган ўзбекистонликларнинг патентлари борасидаги саволларга жавоб қайтарди.
Авазбек Ҳожиматов Россия ҳудудида вақтинча бўлиш муддати узайтирилгани, янги патент расмийлаштириш тартиби енгиллаштирилганини маълум қилди.
«Россияда коронавирус инфекциясининг кенг тарқалишининг олдини олиш мақсадида 30 апрелгача барча ташкилотларнинг фаолияти тўхтатилди. Натижада Россиядаги ҳамюртларимиз вақтинча ишсиз қолмоқда ва бу ҳолат уларнинг даромадларига ҳам ўз таъсирини кўрсатади.
Ўзбекистон Ташқи ишлар вазирлиги ушбу вазият сабаб Россия томонига меҳнат патенти бўйича тўловлар муҳлатини ишланмайдиган давр тугаб, меҳнат бозори тиклангунича кечиктириш, шу вақт мобайнида меҳнат муҳожирларини маъмурий жавобгарликка тортмасликни сўраб, расмий нота юборди.
Ҳозирги пайтда мазкур масала Россия Федерациясининг ваколатли органлари томонидан кўриб чиқилмоқда», — деган Ташқи ишлар вазирлиги ахборот хизмати раҳбари.
Шунингдек, вазирлик вакили Ўзбекистонга қайтиш мақсадида Новосибирск аэропортида тўпланган ўзбекистонликларнинг ҳайдаб чиқарилиши ҳолати бўйича ҳам изоҳ берди.
«Ўзбекистоннинг Новосибирск шаҳридаги Бош консулхонаси ёрдами билан 2020 йил 22 март куни ‘Толмачёво’ аэропортида бўлган Ўзбекистоннинг 253 нафар фуқаросининг барчаси чартер рейс билан қайтарилган эди.
Республика махсус комиссиясининг 30 мартдан 20 апрелга қадар мамлакатимиздаги барча аэропортларни вақтинча ёпиш ва авиарейсларни тўхтатиш тўғрисидаги қарори қабул қилинганига қарамай, Ўзбекистон фуқароларининг Новосибирск аэропортига келиши давом этмоқда.
2 апрель куни ‘Толмачёво’ аэропорти раҳбарияти томонидан ички рейслар учун электрон чиптага эга бўлган йўловчилардан бошқа шахсларнинг аэропортга киришини чеклаш тўғрисида қарор қабул қилинди. Шу куннинг ўзида Бош консулхона вакиллари аэропортга келиб, барча 87 нафар ўзбекистонликни хостелга жойлаштирган. Вазият назоратга олинган, дипломатларимиз уларнинг ҳолидан хабар олиб турибди», — деди Авазбек Ҳожиматов.
Изоҳ (0)