Қашқадарё вилоятининг Яккабоғ туманида ҳайдовчига қўпол муносабатда бўлган ЙПХ инспекторлари вазифасидан бўшатилди. Бу ҳақда вилоят ИИБ ахборот хизмати хабар бермоқда.
https://www.youtube.com/watch?v=i6-pfvAj1nY&t=282s
Маълум бўлишича, 2020 йилнинг 26 февраль куни Яккабоғ туманининг Жийда қишлоғида хизмат вазифасини бажараётган 4 нафар ЙПХ инспекторлари Lacetti ҳайдовчисини тўхтатиб, спиртли ичимлик истеъмол қилмаганига ишонч ҳосил қилмоқчи бўлади. Ҳайдовчи эса ЙПХ ходимларида буни текширувчи алкотестр йўқлигини айтиб, куннинг қоронғи пайтида жилетсиз фаолият юритаётганидан норози бўлади.
Ҳайдовчини тўхтатган ЙПХ инспектори эса «Мендан жилет сўраш сизгамас, бошлиғим бор, сўрайдиган. Қолаверса, жилет менинг хавфсизлигим учун, сиз учунмас» дея ҳайдовчига қўпол муносабатда бўлади. Иккинчи ходим эса ҳайдовчининг бу эътирозига қўпол жавоб қайтариш баробарида ҳайдовчини «ақл» ўргатмасликка чақиради. Суҳбат давомида ЙПХ инспекторлари ҳайдовчининг автомобили калитини олиб қўйиб, кетишга чоғланади. Бироқ, машинада бироз юргач, ортга қайтади ва машина калтини ҳайдовчига қайтаради.
Вилоят ИИБ ахборот хизматининг маълумот беришича, ИИБ ЙҲХБ ЙПХБ 2-ЙПХ отряди 3-сафарбарлик гуруҳи катта инспекторлари — катта сержант Ғолиб Эгамназаров, Ўктам Эшонқулов, ЙПХ инспекторлари сафдор Маҳмуд Жонузоқов, Элёр Бўритошевнинг ушбу хатти-ҳаракати ўрганиб чиқилган.
Ҳайдовчи билан қўпол муносабатда бўлган катта инспектор Ғолиб Эгамназаров хизмат фаолияти давомида шу каби кўплаб салбий ҳолатларга йўл қўйганлиги учун ички ишлар сафидан бўшатилган. Ўктам Эшонқулов ҳамда сафдор Маҳмуд Жонузоқовлар эса вилоят ИИБ бошлиғи ҳузурида ўтказилган навбатдан ташқари аттестация хулосасига кўра, ЙҲХБ билан боғлиқ бўлмаган бошқа хизматга ўтказилган.
Изоҳ (0)