Давлат хизматлари агентлиги Андижон вилояти бошқармаси ахборот хизматининг маълум қилишича, махсус рухсатнома олиш учун жорий йилнинг 6 апрель кунига қадар 10 960 та ариза келиб тушган. Шундан 9308 таси рад этилиб, 1016 та автомобилга махсус рухсатнома берилган. Бу ҳақда «Дарё» мухбири Умиджон Мамарасулов хабар бермоқда.
ДХА директори Ҳалилулло Тўрахўжаевнинг BMW Х7 ва Mercedes’ларга рухсат олишга ариза бераётган «уддабурон»ларга қилган мурожаатидан сўнг, 636 та ариза мурожаат қилувчилар томонидан қайтариб олинган.
Аризаларни кўриб чиқиш жараёнида 100 га яқин ариза қимматбаҳо маркадаги автомашина эгалари томонидан тақдим этилгани ва етарли асосга эга эмаслиги учун рад этилган. Шунингдек, стикер олиш тоифаларига мос келмаганлар томонидан аризалар юборилиши, белгиланган ҳужжатларни тўлиқ тақдим этмаслик ҳолатлари ҳам рад жавоби берилишига асос бўлмоқда.
Эслатиб ўтамиз, автомашинада ҳаракатланиш ҳуқуқини берувчи ушбу махсус рухсатномани қалбакилаштириш, уни сотиш, қалбаки эканлигини била туриб ундан фойдаланиш Жиноят кодексининг 228-моддаси (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш)га асосан жавобгарликка тортилади.
Изоҳ (0)