Коронавирус тарқалишига қарши курашиш доирасида «Халқ банки» маҳалла қўмиталарида пенсия тарқатишнинг янги тартибига ўтмоқда. Нафақахўрлар ҳар бир кўча ва уйда алоҳида-алоҳида таклиф қилинади. Бу ҳақда «Халқ банки»нинг пул муомаласи ва касса операциялари бўлими бошлиғи Олтибой Шариповга таяниб, «Gazeta.uz» хабар берди.
«Апрель ойидан бошлаб олдингидек кўчма касса орқали пенсияларни тарқатишда маҳалладаги нафақахўрларнинг барчасини йиғмаймиз. Бу алоҳида кўчалар ва уйлар бўйлаб амалга оширилади. Ўн кишидан ортиқ одам тўпланмайди. Бу борада бизга Маҳалла ва оилани қўллаб-қувватлаш вазирлиги ёрдам беради», — дейди Шарипов.
Таъкидланишича, кўчма касса ходимлари антисептик геллар, қўлқоплар ва махсус ҳимоя кийимлари билан таъминланган.
Олтибой Шариповнинг сўзларига кўра, банк нафақахўрларга қатор қулайликларни таклиф этиб, улар орасида пластик карточка эгалари сонини кўпайтириш бўйича ҳам иш олиб бормоқда. «Халқ банки»нинг «Нафақа» (йиллик 8 фоиз) картаси бепул очилади. Картадаги нафақа қолдиғига ойлик фоизлар тўланиши кўзда тутилган.
Шунингдек, ушбу карта орқали овердрафт хизматидан фойдаланиш мумкин — ҳисобда пул етмаса, банк энг кам иш ҳақининг 3 баробари миқдорида кредит беради. Овердрафтдан ҳар ой пенсия тушгунига қадар фойдаланиш мумкин. Кредит муддати — 12 ой, ойлик фоиз ставкаси — 1,33 фоиз.
Молия вазирлиги ҳузуридаги бюджетдан ташқари Пенсия жамғармаси маълумотларига кўра, Ўзбекистонда 3,4 миллион нафақа олувчилар бор бўлиб, уларга ҳар ойи қарийб 2,6 триллион сўм тўланади. Ушбу маблағнинг 82 фоизи нақд пул, қолган қисми карточкалар орқали тўланмоқда.
Мавзуга доир:
Изоҳ (0)