26 март куни сурункали касалликлари билан диспансер назоратида бўлган наманганлик 72 ёшли Р. коронавирус инфекцияси ташхиси билан вилоят юқумли касалликлар шифохонасига ётқизилган эди, дея хабар бермоқда Соғлиқни сақлаш вазирлиги.
Шу куни соат 23:00 лар атрофида махсус лаборатор таҳлиллар натижасида унда ушбу инфекция аниқланган. Беморга ушбу инфекция 12 март куни Туркия сафаридан қайтган ва касаллиги тасдиқланиб, карантинга олинган қизи М.дан юққанлиги далилланган.
Бемор узоқ йиллар давомида қандли диабет, сурункали ўткир юрак етишмовчилиги ва бошқа касалликлар билан даволаниб келган. У 27 март куни тонгда соат 4:30 да шифокорларнинг реанимацион муолажаларига қарамасдан, ўткир миокард инфарктидан вафот этган.
Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков «Ўзбекистон 24» телеканалида қилган чиқишида ушбу ҳолатга тўхталиб ўтиб, вафот этган бу аёлда коронавирус белгилари 26 мартга қадар ҳам намоён бўлмаганини алоҳида қайд этиб ўтди.
Изоҳ (0)