O‘zbekiston Markaziy banki “O‘zbekiston Respublikasi hududida elektron pullarning chiqarilishi va muomalada bo‘lishi qoidalarini tasdiqlash to‘g‘risida”gi qaror loyihasini ishlab chiqdi. Bu haqda Norma xabar berdi.

Foto: “Daryo”

Qayd etilishicha, elektron pullarning asosiy afzalliklaridan biri foydalanuvchilarga banklarda hisobvaraq ochmagan holda, internet orqali to‘lovlarni amalga oshirish imkoniyatini taqdim etishi hisoblanadi. “To‘lovlar va to‘lov tizimlari to‘g‘risida”gi qonunning 21-moddasida O‘zbekiston hududida elektron pullarning chiqarilishi va muomalada bo‘lishi qoidalari belgilangan.

Shuningdek, Markaziy bank “To‘lovlar va to‘lov tizimlari to‘g‘risida”gi qonunning kuchga kirishi munosabati bilan bir qator normativ-huquqiy hujjatlarga o‘zgartirish kiritmoqda, jumladan, Markaziy bank boshqaruvining “O‘zbekiston Respublikasida naqd pulsiz hisob-kitoblar to‘g‘risidagi nizomni tasdiqlash haqida”gi qarori.

Qayd etilishicha, “To‘lovlar va to‘lov tizimlari to‘g‘risida”gi qonun hamda yangi tahrirdagi Soliq kodeksiga muvofiq, O‘zbekiston Respublikasida naqd pulsiz hisob-kitoblar to‘g‘risidagi nizom qayta ko‘rib chiqilib, yangi tahrirda ishlab chiqildi. Amaldagi nizomning tijorat bankining hisob-kitob cheklari va bank plastik kartalari bilan hisob-kitoblar to‘g‘risidagi talablari chiqarib tashlandi. Yangi tahrirda qabul qilingan Soliq kodeksi talablaridan kelib chiqib, soliq organlari tomonidan inkasso topshiriqnomalarini taqdim etish tartiblariga o‘zgartirishlar kiritildi.

Shuningdek olingan kreditlar qaytarilishi uchun kafil bo‘lgan subyektlardan qarzdorliklarni undirish maqsadida akseptsiz to‘lov talabnomasi, nafaqat kredit, balki unga hisoblangan foizlarni undirish uchun ham taqdim etilishi mumkinligi ko‘rsatib o‘tilgan.

Avvalroq Markaziy bank rubl va tengening qadrsizlanishi so‘mning almashuv kursiga nima uchun ta’sir qilmayotganiga izoh bergan edi. Shuningdek, Markaziy bank tomonidan koronavirus tarqalishi va salbiy oqibatlarining oldini olish bo‘yicha bir qator tavsiyalar berilgan.