Ўзбекистонда 24 март ҳолатига кўра, жами 28 066 киши карантинга олинган. Уларнинг 18961 нафари уй шароитида тиббий кузатув остида турибди, 9105 киши эса тиббиёт муассасаларида карантин даврини ўтамоқда. Бу ҳақда Ички ишлар вазирлиги маълум қилди.

Фото: «Дарё»

Хабар берилишича, Тошкент шаҳрида жами 7391 киши, шу жумладан 4914 киши уйда, 2477 киши касалхоналарда карантинга олинган. Тошкент вилоятида карантинга олинганлар сони 4614 кишини ташкил этади. Уларнинг 2685 нафари уй шароитида, 1930 нафари эса касалхона шароитида карантинга олинган.

Вазирликнинг маълум қилишича, карантин қоидаларига амал қилмагани учун жами 64 киши маъмурий жавобгарликка тортилган. Уларнинг 12 нафари Тошкент шаҳри, 16 нафари Тошкент вилояти ва 10 нафари Жиззах вилоятида қайд этилган.

Шунингдек, Бухоро вилоятида 6 киши жаримага тортилган бўлса, Самарқанд, Қашқадарё, Сурхондарё, Сирдарё ва Хоразм вилоятларида 3 кишидан карантин қоидаларини бузганлар аниқланган. Фарғона вилоятида 2 киши, Навоий ва Наманган вилоятларида бир кишига маъмурий чора кўрилган бўлса, Андижон вилояти ва Қорақалпоғистонда бундай ҳолат қайд этилмаган.

Шунингдек, карантин қоидаларига риоя қилмагани учун уч киши жиноий жавобгарликка тортилган. Уларнинг икки нафари Самарқанд вилоятида, бир нафари эса Қорақалпоғистонда қайд этилган.

Мавзуга доир: Ўзбекистонда коронавирусга қарши курашишга бир кунда 5 млрд сўмдан ортиқ маблағ йиғилди

Аввалроқ, Тошкент шаҳар ИИББ фуқароларни карантин талабларига беписанд бўлмасликка чақирган эди. Айни пайтда Ўзбекистонда коронавирусга чалинганлар сони 55 кишини ташкил этмоқда, тўрт нафар беморнинг аҳволи оғир эканлиги маълум қилинди. Мамлакатда коронавирусни аниқлаш бўйича тест тизими ишлаб чиқилди.

Мавзуга доир: «Ижтимоий фикр»: Ўзбекистонликларнинг 75 фоиздан ортиғи коронавирус ҳақида хабардор