Ўзбекистон Хитойга ерёнғоқ экспорт қилишни бошлайди. Бу ҳақда «Дарё»га «Ўздавкарантин» матбуот хизмати хабар берди.
2019 йилнинг 5—10 ноябрь кунлари Хитойда бўлиб ўтган Халқаро импорт маҳсулотлари кўргазмасида Ўзбекистон ва Хитой карантин хизматлари ўртасида Хитойга ерёнғоқ экспорт қилишга доир келишув имзоланганди.
Мазкур савдо битими доирасида ўзбекистонлик тадбиркорларга янада кўпроқ қулайликлар, енгиллик яратиш мақсадида маҳсулотларни автотранспортда учинчи мамлакат ҳудудидан транзит орқали етказиш бўйича келишув ҳам имзоланди. Шу асосда эндиликда тадбиркорлар Хитойга ерёнғоқни Қозоғистондан «Алашанкоу» (темир йўл орқали) ва «Хоргос», Қирғизистондан «Иркештам» ҳамда «Тургарт» чегара ўтказиш пунктлари орқали автотранспортда бемалол олиб ўтиши мумкин.
Айни кунларда Ўзбекистондаги ерёнғоқ маҳсулотини қадоқловчи корхоналар Хитой Бош божхона бошқармаси сайтида рўйхатдан ўтказилган. Ҳозирча Хитой давлатининг фитосанитар талабларига жавоб берган экспортёр корхоналарнинг умумий сони 10 та бўлиб, дастлабки экспорт натижаларига қараб ушбу рўйхат кенгайтирилади.
Келишувга асосан, ерёнғоқ етиштириладиган далалар, уни қадоқлаш цехлари, сақлаш омборхоналари Ўзбекистон ва Хитой карантин хизматларининг биргаликдаги рўйхатидан ўтказилиши лозим.
Эслатиб ўтамиз, Ўзбекистонда коронавирус инфекцияси тарқалишига қарши кучайтирилган тартиб жорий этилди. Республикада маҳаллий авиақатновлар ва республика бўйлаб поездларда йўловчи ташиш тўхтатилди.
Изоҳ (0)