Financial Times Германияда коронавирус борасида аномал ҳолат кузатилаётгани ҳақида ёзди. Гап шундаки, мамлакатда COVID-19 касаллиги тарқалиши даражаси юқори, лекин ўлим ҳолати камдир.
Нашрнинг қайд этишича, коронавирус Германигага «бор кучи билан зарба берди» ва мамлакатда касалланиш ҳолатлари ортиб бормоқда. Дунё бўйлаб коронавирус ҳақидаги маълумотларни йиғаётган Жон Ҳопкинс университети маълумотларига кўра, 19 март куни мамлакатда касалланганлар сони 13 979 кишини ташкил этган. Бу Хитой, Италия ва Испанийдан бошқа барча давлатлардаги ҳолатлардан кўп.
Бироқ мамлакатда шу вақтгача фақат 42 та коронавирусдан ўлим ҳолати қайд этилган. Таққослаш учун, қўшни Францияда 9 058 киши касалланди, 243 киши вафот этди, Испанияда эса 17 395 нафар касалланганга 803 та ўлим ҳолати тўғри келди. Бундан ташқари, коронавирусдан ўлим ҳолати Германияга нисбатан АҚШ, Буюк Британия ва ҳатто Жанубий Кореяда ҳам юқорироқ.
Мутахассисларнинг фикрича, бундай аномал ҳолат Германияда коронавируснинг тарқалиши нисбатан эрта босқичда бўлгани ва касалланганлар бошқа мамлакатлардагига қараганда ёшроқ эканида. Жуда кўп ўтказилган текширувлар ушбу аномалияни келтириб чиқариши мумкин бўлган яна бир омил сифатида кўрилмоқда.
Германия лабораторияларида ҳар ҳафта қарийб 160 мингта текширув ўтказилмоқда. Бу Европанинг исталган бошқа давлатлари умумий ҳисобда ўтказган текширувлардан ҳам кўп.
Аввалроқ Туркияда коронавирус билан касалланганлар сони бир кунда қарийб икки баравар кўпайгани, Италияда коронавирусдан бир суткада 627 киши вафот этгани, Қирғизистонда яна 6 кишида коронавирус аниқлангани хабар берилган эди. Ўзбекистонда эса коронавирусга чалинганлар сони 41 нафарга етди.
Изоҳ (0)