Turkiyada koronavirus bilan kasallanganlar soni bir kunda qariyb ikki baravar ko‘payib, 670 nafarga yetdi, vafot etganlar soni 9 nafarni tashkil qilmoqda, deb ma’lum qildi mamlakat sog‘liqni saqlash vaziri Fahriddin Xo‘ja.
Fahriddin Xo‘ja 19-mart kuni Turkiyada koronavirusga chalinganlar soni 191 kishidan 359 kishiga yetgani, bemorlarning 4 nafari vafot etganini ma’lum qilgan edi.
“So‘nggi bir sutka davomida koronavirusni aniqlash uchun 3 656 ta tahlil o‘tkazildi. Ularning 311 tasi ijobiy chiqib, kasallanganlar soni 670 taga yetdi. Bugun keksa va zaiflashgan besh nafar bemorni yo‘qotdik. Umumiy hisobda 9 kishi vafot etdi”, — deb yozgan Xo‘ja Twitter’da.
Eslatib o‘tamiz, 11-mart kuni Turkiyada koronavirus bilan kasallanish bo‘yicha dastlabki holat aniqlangandi. Mamlakat fuqarosi Yevropaga borganida koronavirusni yuqtirib olgan. U bilan aloqada bo‘lganlarning barchasi shifokorlar nazoratiga olingan. 18-mart kuni esa mamlakatda koronavirusdan birinchi o‘lim holati qayd etilgan.
Hukumat turoperatorlarga koronavirus tarqalishi munosabati bilan sayyohlik mavsumini boshlashga shoshilmaslikni tavsiya qilgan. Shuningdek, koronavirus pandemiyasi sababli barcha maktablar 16-martdan boshlab 1 haftaga yopilgan.
O‘zbekistonda esa koronavirusga chalinganlar soni 37 nafarga yetdi.Mavzuga doir: Italiyada koronavirusdan bir sutkada 627 kishi vafot etdi. Bu — rekord
