Ўзбекистонлик 4 паралимпиячи антидопинг қоидаларини бузганлик учун 4 йилга мусобақалардан четлатилди. Улар орасида 3 пауэрлифтер ва бир енгил атлетикачи бор. Бу ҳақда Халқаро паралимпия қўмитаси хабар берди, деб ёзади GoSport.
«Спортчи атайлаб ёки ўзи билмаган ҳолда тақиқланган моддани қўллаганидан қатъи назар, унинг допинг намунасида тақиқланган модда аниқланганда антидопинг қоидабузарлиги юз беради» — дейилади хабарда.
Таъкидланишича, Исмира Исломова ва Шаҳзода Мамадалиеванинг Франциядаги 2018 йилги Жаҳон чемпионатида олинган допинг-намуналарида Бутунжаҳон антидопинг агентлиги (WADA) томонидан тақиқланган модда борлиги аниқланган. Спортчилар 2018 йил 31 августдан 2022 йил 30 августгача мусобақалардан четлатилиб, уларнинг 2018 йил май ойидан кейинги натижалари бекор қилинади.
Муслима Нуриддинованинг Японияда ўтган Осиё ва Океания давлатлари ўртасидаги мусобақа вақтида топширган тести ижобий натижа тақдим этган. У 2018 йил 30 ноябридан 2022 йил 29 ноябригача қадар мусобақалардан четлатилган. Унинг ҳам мусобақада қайд этган натижалари бекор қилинган. Камола Абдуллаева 2018 йилги Параосиё ўйинлари вақтида тақиқланган модда қабул қилганлиги маълум қилинган. У 2019 йил 11 февралидан 2023 йил 10 февралига қадар мусобақалардан четлатилган ва натижалари бекор қилинган.
Ўз ўрнида ушбу хабарлардан сўнг Ўзбекистон миллий антидопинг агентлиги юқорида номи тилга олинган спортчиларнинг 2018—2019 йилларда дисквалификацияга учрагани таъкидлаб баёнот берган. Аммо ташкилот сайтидан спортчиларнинг дисквалификация қилингани ҳақида хабарни топиб бўлмади. Фақатгина 2019 йил январида агентинлик допинг аниқланган спортчилар қаторида Исмира Исломова ва Шаҳзода Мамадалиевани тилга олиб ўтган.
Изоҳ (0)