O‘zbekistonlik 4 paralimpiyachi antidoping qoidalarini buzganlik uchun 4 yilga musobaqalardan chetlatildi. Ular orasida 3 pauerlifter va bir yengil atletikachi bor. Bu haqda Xalqaro paralimpiya qo‘mitasi xabar berdi, deb yozadi GoSport.
“Sportchi ataylab yoki o‘zi bilmagan holda taqiqlangan moddani qo‘llaganidan qat’i nazar, uning doping namunasida taqiqlangan modda aniqlanganda antidoping qoidabuzarligi yuz beradi” — deyiladi xabarda.
Ta’kidlanishicha, Ismira Islomova va Shahzoda Mamadaliyevaning Fransiyadagi 2018-yilgi Jahon chempionatida olingan doping-namunalarida Butunjahon antidoping agentligi (WADA) tomonidan taqiqlangan modda borligi aniqlangan. Sportchilar 2018-yil 31-avgustdan 2022-yil 30-avgustgacha musobaqalardan chetlatilib, ularning 2018-yil may oyidan keyingi natijalari bekor qilinadi.
Muslima Nuriddinovaning Yaponiyada o‘tgan Osiyo va Okeaniya davlatlari o‘rtasidagi musobaqa vaqtida topshirgan testi ijobiy natija taqdim etgan. U 2018-yil 30-noyabridan 2022-yil 29-noyabrigacha qadar musobaqalardan chetlatilgan. Uning ham musobaqada qayd etgan natijalari bekor qilingan. Kamola Abdullayeva 2018-yilgi Paraosiyo o‘yinlari vaqtida taqiqlangan modda qabul qilganligi ma’lum qilingan. U 2019-yil 11-fevralidan 2023-yil 10-fevraliga qadar musobaqalardan chetlatilgan va natijalari bekor qilingan.
O‘z o‘rnida ushbu xabarlardan so‘ng O‘zbekiston milliy antidoping agentligi yuqorida nomi tilga olingan sportchilarning 2018—2019-yillarda diskvalifikatsiyaga uchragani ta’kidlab bayonot bergan. Ammo tashkilot saytidan sportchilarning diskvalifikatsiya qilingani haqida xabarni topib bo‘lmadi. Faqatgina 2019-yil yanvarida agentinlik doping aniqlangan sportchilar qatorida Ismira Islomova va Shahzoda Mamadaliyevani tilga olib o‘tgan.
Izoh (0)