Бутун дунёда коронавирус юқтирганлар сони 200 минг кишидан ошди

Бутун дунёда коронавирус юқтириб олганлар сони 200 минг кишидан, унинг қурбонлари сони эса 8 минг кишидан ошди. Бу ҳақда Жаҳон соғлиқни сақлаш ташкилоти (ЖССТ)нинг раҳбари Тедрос Гебрейесус маълум қилди, деб ёзмоқда «РБК».

Унинг сўзларига кўра, касалликка чалиниш ҳолатларининг катта қисми, яъни 80 фоизи икки минтақада — Европа ва Осиё-Тинч океани минтақасига тўғри келмоқда.

ЖССТ раҳбарининг таъкидлашича, мамлакатлар бирлашиши керак. У Жанубий Кореяни коронавирусга қарши самарали кураш намунаси сифатида кўрсатди. Мазкур мамлакатда коронавирус бир ой олдин жиддий авж олган эди. Бу мамлакатда коронавирусни аниқлаш бўйича инновацион стратегия ишлаб чиқилган ва ниқоб тақиш мажбурий этиб белгиланган. Бундан ташқари, Жанубий Кореяда касалликка шубҳаланган шахслар шифохоналарда ёки уйда эмас, балки белгиланган жойларда изоляция қилинган.

«Натижада, бир неча ҳафтадан буён у ерда COVID-19 инфекциясини юқтирганлар сони камаймоқда. Касаллик Жанубий Кореяда энг юқори чўққига чиққанда, кунига 800 дан ортиқ ҳолат қайд этилди, кеча эса уларнинг сони 90 тани ташкил этди», — деди Жаҳон соғлиқни сақлаш ташкилоти бош директори.

Ташкилотнинг сўнгги маълумотларига кўра, сўнгги бир кун ичида дунёда 11 525 та янги ҳолат аниқланди. Вафот этганлар сони эса 8192 кишини ташкил этган.

Ўтган йилнинг охирида Хитойнинг Ухань шаҳрида тарқала бошлаган коронавирус барча Европа мамлакатларида аниқланди. Черногория Европадаги бу касаллик қайд этилган сўнгги мамлакат бўлди.

Пандемия фонида Европа Иттифоқи чет элликлар учун киришни бир ойга чеклашга қарор қилди. Ушбу давр мобайнида Европа Иттифоқига кирмайдиган мамлакатлар фуқаролари, агар уларда фавқулодда сабаб, доимий яшаш ҳуқуқи ёки узоқ муддатли виза бўлмаса, чегараларни кесиб ўтолмайди. Бундан ташқари, коронавирус сабабли «Евровидение» мусиқа танлови бекор қилинди.

Европа мамлакатларида коронавирус пандемиясининг тарқалиши фонида автомобиль ишлаб чиқариш тўхтатилади. Шунингдек, коронавирус АҚШнинг барча штатларида аниқланди. Хитойда ўтган сутка ичида коронавирусни юқтириш билан боғлиқ 13 та янги ҳолат қайд этилди.