Трамп Хитойнинг коронавирус АҚШ ҳарбийлари томонидан тарқалгани тўғрисидаги тахминини ёлғон деб атади

АҚШ президенти Дональд Трамп Хитойни америкалик ҳарбийлар қасддан хитойликларга коронавирус юқтиргани тўғрисида ёлғон хабар тарқатганликда айблади. Бу ҳақда Трамп Оқ уйда ўтказилган брифинг давомида маълум қилди, деб хабар беради National Review.

«Хитой бизнинг ҳарбийлар уларга вирус юқтиргани ҳақида ёлғон маълумотни тарқатди. Бу ёлғон. Баҳслашиш ўрнига, мен вирус қаердан чиққанини айтишим керак. У ростдан ҳам Хитойдан тарқалди», — дейди Трамп.

Аввалроқ, Хитой Ташқи ишлар вакили Чжао Лицзянь коронавирусни Уханга америкалик ҳарбийлар олиб келган бўлиши мумкин деган фикрни билдирган эди. У бу тахминни АҚШ касалликларни олдини олиш маркази раҳбари Роберт Редфилд Вакиллар палатасида сўзлаган нутқига асосланиб айтган. Роберт Редфилд ўз нутқида гриппдан вафот этган бир неча америкаликларнинг жасадлари текширилганда уларнинг танасида коронавирус топилганини айтган.

Хитой ТИВ вакили «АҚШда ‘нолинчи бемор’ қачон пайдо бўлгани, инфекцияни юқтириб олганлар сони ва улар қайси шифохонага жойлаштирилгани ҳақида саволни ўртага ташлаган. Ушбу баёнотдан сўнг, АҚШ Давлат департаменти Хитой элчиси Суй Тянкайни чақириб олган. У билан давлат котибининг маслаҳатчиси Дэвид Стилвелл гаплашиб, хитойлик дипломатга фактларни тақдим этган.

Хитой Ташқи ишлар вазирлигида бу маълумот тасдиқланмаган. Вазирлик вируснинг келиб чиқиши бўйича олимлар шуғулланиши лозимлигини таъкидлаган.