Саудия Арабистонида коронавирус тарқалиши олдини олиш мақсадида Маккадаги Ал-Ҳаром ва Мадинадаги Набавий Масжиддан ташқари барча масжидларда жамоат, жумладан, жума намозларини ўқиш вақтинча тўхтатилди, деб хабар беради Suadi Gazette нашри.
«Ар-Риёдда уламолар кенгаши коронавирус оқибатларига бағишланган шошилинч йиғилишда вируснинг тез тарқалиши ва у кўплаб ўлим ҳолатларига олиб келиши хавфи мавжудлигини тасдиқловчи тиббий тадқиқотлар ҳамда одамларнинг тўпланиши вирус тарқалишига асосий сабаб эканлигини ҳисобга олиб, жума ва бошқа жамоат намозларининг масжидларда ўқилиши тўхтатилишини қонуний деб топди, масжидлар эшиклари вақтинча ёпилади, бу вазиятда азон ўқилиши етарли ҳисобланади», — дейилган уламолар қарорида.
Шунингдек, Саудия Арабистонида 15 кунга барча хусусий корхоналар фаолияти тўхтатилади. Таъкидланишича, ушбу қарор фаолияти соғлиқни сақлаш ва озиқ-овқат таъминоти билан боғлиқ бўлган корхоналардан ташқари барча корхоналар учун тааллуқли ҳисобланади.
Айни вақтда подшоҳликда коронавирусга чалинганлар сони 171 нафарга етган. Ўлим ҳолатлари қайд этилмаган.
Мавзуга доир:
Аввалроқ, Ўзбекистон Мусулмонлари идораси Уламолар кенгаши коронавирус тарқалишининг олдини олиш юзасидан мамлакат мусулмонларига мурожаат ва чақириқ билан чиқиб, мамлакатда жума намозлари вақтинча ўқилмаслигини маълум қилганди. 16 март куни Намангандаги масжидларда диний маросимлар вақтинча тўхтатилди. Улар тўлиқ дезинфекциядан ўтказилмоқда.
Изоҳ (0)