Тошкентда бир кунда қиймати 123 млн сўмлик сифатсиз тиббий ниқобнинг ноқонуний равишда савдога қўйилгани аниқланди

17 март, сешанба куни, Тошкент шаҳрида ўтказилган назорат тадбирлари давомида 62 785 дона, умумий қиймати 123,8 миллион сўмлик ҳеч қандай сифат сертификатига эга бўлмаган тиббий ниқоб савдога қўйилганлиги аниқланди. Бу ҳақда «Дарё»га Тошкент шаҳар давлат солиқ бошқармаси матбуот хизмати маълум қилди.

Хабар берилишича, Тошкент шаҳар Мирзо Улуғбек туманида ўтказилган профилактик тадбирлар давомида фуқаро Азимжон Абдуллаев (исм ва фамилиялар ўзгартирилган) Қорасув-2 мавзесидаги Дониёр берк кўчасида ҳеч қандай ҳужжатларсиз, сифати кафолатланмаган тиббий ниқобларни савдога қўйганлиги маълум бўлди. Тадбир давомида мазкур фуқародан умумий қиймати 93,24 миллион сўм бўлган жами 48 960 дона бир марталик тиббий ниқоб вақтинча олиб қўйилган.

Миробод туманида ўтказилган профилактик тадбирлар давомида ҳудуддаги «Миробод деҳқон бозори»га туташ вақтинча автомашиналар тўхташ жойида пойтахтнинг Яккасарой тумани Сарабўстон кўчасида яшовчи фуқаро Фарҳод Жавоҳиров (исм ва фамилияси ўзгартирилган) томонидан ҳеч қандай сифат сертификатига эга бўлмаган жами 7000 дона, умумий қиймати 10,5 миллион сўмлик тиббий ниқоблар ноқонуний савдога қўйилгани аниқланди. Ҳолат юзасидан қонуний чора кўриш учун тегишли ҳужжатлар расмийлаштирилди.

Назорат тадбирлари пойтахтнинг Шайхонтоҳур туманида ҳам ўтказилди. Ҳудуддаги аҳоли гавжум жойларда ўтказилган тадбирлар давомида уч нафар фуқаро томонидан жами 4850 дона, умумий қиймати 14,3 миллион сўмлик тиббий ниқоблар ноқонуний равишда савдога қўйилгани маълум бўлди. Мазкур ҳолатлар юзасидан қонуний чора кўриш учун тегишли ҳужжатлар расмийлаштирилган.

Айни кунларда Тошкент шаҳар давлат солиқ хизмати органлари ходимлари томонидан озиқ-овқат ва зарур тиббий воситалар нархлари сунъий оширилишининг олдини олиш мақсадида мониторинг тадбирлари ҳам олиб борилмоқда.

Жумладан, Сергели тумани давлат солиқ инспекциясининг «Ишонч телефони»га ҳудуддаги «Сергели деҳқон бозори» ёнида жойлашган дорихонада нархлар асоссиз равишда оширилгани, тиббиётда ишлатиладиган спирт одатдагидан қиммат сотилаётганлиги тўғрисида мурожаат келиб тушган.

Мазкур ҳолатлар юзасидан туман давлат солиқ хизмати ходимлари жойига чиққан ҳолда сотувчилар билан профилактик суҳбатлар ўтказиб, бу каби ҳолатлар такроран содир этилган тақдирда қонуний чоралар кўрилиши ҳақида батафсил тушунтириш берган.

Тошкент шаҳар давлат солиқ бошқармаси фуқароларни мамлакатда коронавирус тарқалиб кетишининг олдини олиш мақсадида эълон қилинган карантин даврида осойишталик билан тўғри йўл тутишга чақирмоқда. Мазкур вазиятни имконият деб билиб, ўз нафсини устун қўядиган, ушбу жараёнларда ўз юртдошларининг ҳамёнини «ўмаришга» уринаётган сохта «тадбиркор»ларнинг ҳар қандай қинғир иши албатта фош бўлиши таъкидланган.

Қайд этилишича, санитария талабларига жавоб бермайдиган бундай воситалар ҳеч қандай ҳимоя чорасига эга бўлмаслиги мумкин. Шу сабабли тиббий воситаларни харид қилишда сифат сертификатига эътибор қаратиш лозим, дейилади бошқарма хабарида.

Агар фуқаролар зарур бўлган маҳсулотлар нархининг асоссиз кўтарилганига гувоҳ бўлса, Тошкент шаҳар давлат солиқ бошқармасининг +99871 2445486 рақамли «ишонч телефони» га қўнғироқ қилиши сўралади.

Эслатиб ўтамиз, 15 март куни бош вазир Абдулла Арипов раҳбарлигида коронавирусга қарши кураш бўйича ўтказилган йиғилишдан кейин Давлат солиқ қўмитаси раиси озиқ-овқат маҳсулотлари нархи назоратга олинишини маълум қилган эди. Шундан сўнг, қўмита вилоятга қатновчи таксичилардан талабаларнинг уйга қайтаётганидан фойдаланиб, нархларни кўтармасликни сўради. Ўзбекистондаги тадбиркорлардан коронавирус карантини шароитида нархларни оширмаслик ҳақида кафолат хати олинаётгани маълум бўлди ҳамда қайси товарлар нархи сунъий оширилиб, халқни ғазаблантираётгани айтилди. Давлат солиқ қўмитаси раиси ўринбосари Абдулла Азизов нархларни атайлаб ошираётган савдогарлар борлигидан огоҳлантирди.

Шу билан бирга, Ўзбекистонда тиббий ниқоблар қимматлашганининг сабаби тушунтирилди ҳамда мамлакатда бир кунда ишлаб чиқарилаётган тиббий ниқоблар сони маълум қилинди.