Davlat soliq qo‘mitasi raisi Behzod Musayev karantin vaqtida O‘zbekistonda bozorlar yopilmasligini ma’lum qildi.

Eng muhimi, birinchi navbatda, vahimaga tushmaslik. O‘tgan ikki oy davomida biror bir mahsulotga narx oshdimi? Yoki narx oshishiga biror omil ta’sir qildimi? Hech qanday ta’sir bo‘lgani yo‘q.

Soliq organlari va prokuratura huzuridagi departament xodimlari bilan birgalikda doimiy asosda ishlaydigan maxsus shtab tuziladi va har bir bozordagi vaziyat nazoratga olinadi.

Shukur qilib aytishimiz kerak, O‘zbekiston oziq-ovqat mahsuloti bilan o‘zini-o‘zini ta’minlay oladigan mamlakat. Go‘sht mahsuloti bo‘ladimi, poliz mahsulotimi, hamma mahsulotlar hech qanday muammo bo‘lmasligi kerak.

Odamlarimiz vahimaga tushmaslik uchun aytmoqchimanki, hukumat tomonidan bunday vaziyat doimiy asosda nazoratga olib boriladi. Nafaqat Toshkentda, balki hududlardagi bozorlarda ham. Birorta bozor, birorta savdo do‘koni, birorta ovqatlanish shoxobchasi yopilishiga yo‘l qo‘yilmaydi. Bozorlarimiz juda ham to‘kin-sochin.

Behzod Musayev, Davlat soliq qo‘mitasi raisi

Shuningdek, Soliq qo‘mitasi raisi har bir hududda oziq-ovqat mahsulotlarini oshirilgan narxlarda sotilishining oldini olishga qaratilgan tezkor profilaktik choralarning ko‘rilishini shaxsan nazoratga olganligini va murojaatlar e’tiborsiz qolmasligini kafolatlagan.

“Agar murojaatingiz bo‘lsa, Davlat soliq qo‘mitasining 24 soat mobaynida faoliyat olib borayotgan Call markazi (1198) va “Ishonch telefoni”ga (71) 244 – 98- 98 bog‘lanishingiz mumkin”, — deyiladi xabarda.