Бугун,

  • USD 10920.28
  • RUB 177.49
  • EUR 11052.42

Москвадан Тошкентга етиб келган 500 га яқин ўзбекистонликлар Бўстонлиқ тумани «Қизилсув» маҳалласи «Сокол» спорт-соғломлаштириш марказига 14 кунга карантинга олинди. Лекин фуқаролар у ерда шароитлар йўқлигидан шикоят қилмоқда, деб хабар бермоқда «Gazeta.uz».

Фото: «Gazeta.uz»

Карантинга олинган эркаклардан бирининг айтишича, рейс 17—18 март кунлари Uzbekistan Airways ва «Аэрофлот» авиакомпаниялари томонидан амалга оширилган. У бошқа фуқаролар билан бирга 18 март, чоршанба куни, Қизилсув дараси жойлашган спорт-соғломлаштириш марказига келган. «Биздан аввал яна бир рейс учиб келганди. Уларни биздан олдин жойлаштириб бўлишди. Яъни бу ерда иккита рейснинг йўловчилари — тахминан 500 киши бор», — дейди у.

Аввалроқ Uzbekistan Airways чет эллик фуқароларни Москвага ва ўзбекистонлик фуқароларни Москвадан Тошкентга олиб келиш учун 17 март, сешанба куни, Тошкент—Москва—Тошкент чартер рейсни амалга ошириши хабар берилган эди.

Ушбу рейс 18 март куни ўзбекистонликларни Тошкентга олиб келган «Аэрофлот» томонидан соат 3:17 да амалга оширилган. Ортга қайтишда авиакомпания Москвага 282 нафар россияликни олиб кетишни режалаштирган.

Фото: «Gazeta.uz»

«Биз эрталаб соат тўртларда қўндик. Самолётдан чиқиш жуда узоқ вақт олди, одамлар битталаб чиқарилди. Сўнг нимадир пуркашди, нималиги ҳақида ҳатто огоҳлантиришмади ҳам. Кейин эса трапдан тушишимиз билан автобусларга жойлаштиришди. Ишчиларнинг барчаси тиббий ниқобда эди, лекин ҳамма йўловчилар ҳам ниқоб тақмаганди, гарчи уларга кейин ниқоблар тарқатилган бўлса ҳам. Биз автобусга ўтириб кута бошладик, бизга ҳеч ким ҳеч нарсани тушунтирмади. Ҳайдовчидан «Сокол» соғломлаштириш марказига кетаётганимизни зимдан билиб олдик, лекин у ерда бизни қандай шароит кутиб турганидан бехабар эдик», — дейди у.

Эркакнинг таъкидлашича, соғломлаштириш маркази кўп миқдордаги одамларни қабул қилишга тайёр эмасди.

«Хоналар 5 кишига мўлжалланган, 16 та хона бўлган бир қаватда аёллар ва эркаклар учун биттагина ҳожатхона ва ҳаммом бор эди. Овқатланиш хонаси ҳам умумий. Хонада иситиш тизими йўқ, ишламайдиган кичкинагина иситгич қурилмаси турибди. Бу ерда касал бўлишимизни ҳамма билиб турибди. Бу ерда ҳамма бир бири билан алоқада бўляпти. Бу эса аксинча, коронавирус юқиши учун шароит яратади. Объект яқинда топширилгани кўриниб турибди, электр симлар тармоғи ўрнатилмаган, шунчаки ташқарида турибди, холос. Иссиқ сув бор, лекин баъзан ўчиб қолади», — дея сўзларини давом эттиради карантиндаги эркак.

«Оромгоҳ бир кун олдин огоҳлантирилди»

«Gazeta.uz» «Сокол» оромгоҳи директорининг тарбиявий ишлар бўйича ўринбосари Мадина Расулова билан боғланган. Унинг сўзларига кўра, оромгоҳ ёзда ишлайди, аммо карантин ҳолатидан хабардор бўлган.

«Менга лагер раҳбарияти (директор Собир Холиев — таҳр.) 500 га яқин одам карантинда эканлиги тўғрисида хабар берди. Улар билан ҳали ҳеч ким гаплашмади. Улар билан гаплашиши мумкин бўлган одамлар йўқ. У ерда ошхона ишчилари ва нари борса югурдаклик қиладиганлар ишлайди, холос. Фаррошлик қилиб келган аёллар карантин сабабли ишлашни хоҳламай бўшаб кетди. Мана, энди буларнинг барчаси аслида техник ходим бўлган эракаклар гарданига тушди. Уларни бу ерга олиб келганлар томонидан ҳеч нарса ташкиллаштирилмади. Ҳатто улар билан гаплашиб, тушунтириш берадиган одам ҳам йўқ», — дейди у.

Унинг сўзларга кўра, «Сокол» болалар соғломлаштириш оромгоҳи бўлиб, у ерда ёзда дам олинади. «Бирор марта қишда у ерда ишламаганмиз. Электрга келсак, кучланиш туфайли ҳаммаси «отилади». Учта корпуснинг иккитаси ишлайди, чунки учинчисини ҳам ёқсангиз, ҳаммаси «учади». Овқатланиш хонасидаги 7 киши 500 кишига хизмат кўрсатади. Келганлар жуда яхши шароит ва шу кабиларни кутган бўлса керак, лекин уларни «Сокол»га олиб келишгани бизнинг айбимиз эмас. Менимча, одамларни бунга умуман қодир бўлмаган болалар соғломлаштириш марказига жойлаштириш ҳақида қарор чиқарган одам буни ташкиллаштириши керак эди», — дейди директор ўринбосари.

Фото: «Gazeta.uz»

Мадина Расулованинг таъкидлашича, оромгоҳ йўловчиларнинг карантинга жойлаштирилиши ҳақида олдиндан огоҳлантирилмаган. «Ходимлар икки кечадан бери ухламаябди, чунки оромгоҳ июнда очилиши керак эди. У сентябрда ёпилди ва ҳозир очилди. Одатда таъмирлаш ишлари апрель—май ойларида амалга оширилади. Одамлар битта умумий душ борлигидан шикоят қилмоқда. 48 кишига 6 та душ кабинаси ва 6 та санузел бор. Бу болалар соғломлаштириш маркази, пансионат ёки беш юлдузли меҳмонхона эмас», — дейди у.

«Сокол» спорт-соғломлаштириш маркази вакилининг сўзларига кўра, у оромгоҳга ташрифи чоғида Тошкент вилояти ҳокимлигига қишги мавсумда иситиш учун имконият йўқлигини тушунтирган. «У ерда ҳозир ҳақиқатдан ҳам совуқ, чунки бино деворлари бетондан. Уларнинг ҳар бирининг хонасига 100 га яқин иситгичлар келтирилди», — дейди Мадина Расулова.

Фото: «Gazeta.uz»

Хабарда айтилишича, оромгоҳ ҳудудида 550 киши бор. Уларнинг келиши ҳақида оромгоҳ маъмурияти бир кун аввал хабардор қилинган.

Таҳририят «Сокол» директори Собир Холиевдан изоҳ ололмаган.

Тошкент вилояти маъмурияти «Сокол» оромгоҳида карантинда сақланаётган фуқароларнинг муаммоларини энг қисқа вақт ичида ҳал этишга ваъда берган. Шунингдек, Тошкент вилояти ва Бўстонлиқ тумани ҳокимлари ҳамда Вазирлар Маҳкамаси ва Соғлиқни сақлаш вазирлигининг бошқарув ходимлари муаммони ҳал этиш учун жўнаб кетган.

Одамларни қулайроқ шароитларда жойлаштириш режалаштирилган. Улар икки кишидан жойлаштирилади ва коронавирус инфекциясини аниқлаш учун тезкор тестдан ўтказилади.

Изоҳ
Асосий янгиликлар