Мактабгача таълим муассасаларида карантин даврида мактабгача таълим муассасаси мудираси, методист, хўжалик мудири, ҳамшира, фаррош ва қоровул фаолиятини иш жойида амалга оширади. Бу ҳақда 18 март, чоршанба куни, коронавирус инфекцияси тарқалишининг олдини олиш ва профилактика қилиш юзасидан амалга оширилган чора-тадбирлар мавзусидаги давра суҳбатида маълум қилинди.
Қолган барча МТМ ходимлари 18 март санасидан бошлаб режадан ташқари ҳақ тўланадиган меҳнат таътилига чиқади.
Давра суҳбатида Мактабгача таълим вазири Агриппина Шин Ўзбекистон ҳукумати ва Республика санитария-эпидемиологик осойишталик агентлиги раҳбари Баҳром Алматовнинг расмий мурожаати асосида Мактабгача таълим вазирлиги томонидан тезкор чоралар амалга оширилганини айтди. 15 мартдаги 39-рақамли қарор асосида Ўзбекистондаги барча мактабгача таълим муассасалари тарбияланувчилари учун 16 март кунидан таътил эълон қилингани билдирилди.
Карантин шартли равишда 31 мартгача давом этиши белгиланган. Аммо мазкур муддат Республика махсус комиссияси томонидан бериладиган буйруқ билан ўзгариши мумкин. Шунингдек, давра суҳбатида барча МТМларнинг бинолари, гуруҳлар, мебеллар, ўйинчоқлар ва ҳожатхоналар дезинфекция қилингани, Республика санитария-эпидемиологик осойишталик агентлигининг туманлардаги вакиллари томонидан бинолар, маҳсулот блоклари санитар ишловдан ўтказилгани таъкидланди.
Эслатиб ўтамиз, 15 март куни Ўзбекистон бош вазири Абдулла Арипов иштирокидаги йиғилишда коронавирус сабаб Ўзбекистондаги барча мактаблар, боғчалар ва ОТМлар карантинга ёпилиши маълум қилинган эди.
Изоҳ (0)