Республика бош давлат санитария инспектори Нурмат Отабеков ҳомиладор аёллар коронавирус инфекциясидан қандай сақланиши кераклиги ҳақидаги саволга жавоб берди, деб хабар берди «Darakchi.uz».
«Коронавирус инфекциясидан сақланиш бўйича ҳомиладорлар учун алоҳида кўрсатмалар мавжуд эмас. Касаллик ҳаво томчи йўли ва мулоқот орқали юқиш эҳтимоли кучли бўлгани сабабли, ҳомиладор аёллар ҳам барча профилактика чораларига ва карантин талабларига амал қилишлари талаб этилади.
Ҳозирда алоҳида тоифаларни даволаш усуллари ҳам мавжуд эмас. Ҳозирги кунда Жаҳон соғлиқни сақлаш ташкилоти қандай тоифага мансуб бўлишидан, ирқидан, миллатидан қатъи назар коронавирус инфекциясига чалинган шахсларни даволаш бўйича кўрсатмаларни ишлаб чиққан. Айнан шу даволаш баённомалари асосида Ўзбекистонда ҳам даволаш чора-тадбирлари қўлланилади».
Эслатиб ўтамиз, 18 март куни Ўзбекистонда коронавирус инфекциясини юқтириб олган фуқаролар сони 13 нафарга етди.
Сўнгги маълумотларга қараганда, Истанбулдан келган Ўзбекистон фуқароси ва Лондонда бўлиб қайтган яна бир Ўзбекистон фуқаросининг турмуш ўртоғида ҳам коронавирус инфекцияси аниқланган.
Аввалроқ Дубайдан келган Ўзбекистон фуқаросида коронавирус аниқланган эди.
Шунингдек 11 март куни Франциядан (вирус 15 март куни аниқланган), 14 март куни Буюк Британиядан, 15 март куни Туркиядан қайтган уч фуқарода коронавирус инфекцияси аниқлангани ҳақида хабар берилган эди.
Бундан ташқари, Франциядан қайтган фуқаронинг ўғли, қизи, турмуш ўртоғи, невараси ва бир қариндошида, Туркиядан қайтган фуқаронинг рафиқаси ва улар билан бир рейсда бўлган бир фуқарода ҳам касаллик аниқланган.
Изоҳ (0)