АҚШнинг Ўзбекистондаги элчихонаси 17 март, сешанба куни, коронавирус тарқалишига тайёргарлик кўриши учун Ўзбекистон Санитария-эпидемиологик осойишталик агентлигига иккинчи хайрия ёрдами сифатида шахсий ҳимоя воситаларини топширди. Бу ҳақда АҚШ элчихонаси томонидан маълум қилинди.
Фото: АҚШнинг Ўзбекистондаги элчихонаси
Қайд этилишича, АҚШ Халқаро тараққиёт агентлиги (USAID) коронавирусдан зарар кўрган ёки унинг тарқалиши хавфи юқори бўлган мамлакатлар, шу жумладан, Ўзбекистон учун юқумли касалликлар бўйича фавқулодда захира фондидан қўшимча маблағ ажратди.
АҚШ Халқаро тараққиёт агентлиги тақдим этган шахсий ҳимоя воситалари таркибига 10 мингта қўлқоп, 10,2 мингта ниқоб, 1400 та махсус халат ва 200 та кўзойнак кирган. Улар бутун Ўзбекистон бўйлаб вилоят марказлари ва шаҳарларга тарқатилади.
Хабар берилишича, АҚШнинг Ўзбекистондаги элчиси Дэниел Розенблюм мамлакатнинг тайёргарлигини юқори баҳолаган. Элчи коронавирус тарқалишига тайёргарлик кўриш ва унга тегишли жавоб қайтаришда USAID Ўзбекистонни келгусида ҳам қўллаб-қувватлаши ва кўмак беришини маълум қилган.
Фото: АҚШнинг Ўзбекистондаги элчихонаси
«Янги коронавирус касаллиги фақатгина ҳукуматлар ва халқаро ташкилотлар ўртасидаги яқин ҳамкорлик орқали бартараф этилиши мумкин бўлган, глобал соғлиқни сақлашга таҳдид солаётган касалликдир. АҚШ ҳукумати ушбу глобал эпидемияга тайёргарлик ва жавоб чораларини қўллаб-қувватлаш мақсадида Ўзбекистондаги ташкилотлар билан яқиндан ҳамкорлик қилмоқда», — деб таъкидлади элчи.
Февраль ойининг охирида АҚШ Ўзбекистонда коронавирус тарқалганда ишлатилиши учун мўлжалланган 600 комплект шахсий ҳимоя воситаларини етказиб берган эди. Шунингдек, февраль ойида АҚШ давлат котиби Майкл Помпео Ўзбекистон коронавирусга қарши туришга тайёр эмаслигини айтганди.
Эслатиб ўтамиз, Ўзбекистон коронавирусга қарши курашда ёрдам сифатида шу вақтга қадар Хитой ва Эронга инсонпарварлик ёрдами жўнатди.
Ўзбекистонда коронавирусга чалинганлар сони 15 нафарга етди. Шунингдек. Қирғизистонда ҳам коронавирусга чалиниш билан боғлиқ дастлабки учта ҳолат қайд этилди. Ўзбекистон Миср, Россия, Эрон ва Латвиядан ўз фуқароларини чартер рейслари билан олиб келди. Бундан ташқари бир қатор Европа давлатларидан ҳам чартер рейслари амалга оширилиши режалаштирилмоқда.
