Ўзбекистонда коронавирусга чалиниш билан боғлиқ биринчи ҳолат қайд этилди. Бемор Франциядан келган

15 март куни соат 6:00 да Республика Вирусология институти лабораториясида Францияда бўлиб қайтган Ўзбекистон фуқаросида COVID-19 коронавируси инфекцияси аниқланди. Бу ҳақда «Дарё»га Санитария-эпидемиологик осойишталик агентлиги маълум қилди.

«Ҳозирда эпидемиологик суриштирув ҳамда касалликни тарқалиб кетмаслиги учун профилактик чора-тадбирлар тўлиқ амалга оширилмоқда», — дейилади агентлик ахборотида. Агентлик ҳолат юзасидан қўшимча маълумот тақдим этилишини қўшимча қилди.

Аввалроқ Жанубий Кореядаги Ўзбекистон фуқаросида коронавирус касаллиги қайд этилгани ҳақида хабар берилган эди.