Вазирлар Маҳкамасининг «Навоий иссиқлик электр станциясида 650 МВт қувватли учинчи буғ-газ қурилмасини қуриш» инвестиция лойиҳасини амалга ошириш чора-тадбирлари тўғрисида»ги қарори лойиҳаси муҳокама учун жойлаштирилди.
Қайд этилишича, Шавкат Мирзиёевнинг 2019 йил 17—20 декабрь кунлари Японияга расмий ташрифи доирасида «Навоий иссиқлик электр станциясида 650 МВт қувватли учинчи буғ-газ қурилмасини қуриш» инвестиция лойиҳасини амалга ошириш учун Ўзбекистон ҳукумати билан Япония халқаро ҳамкорлик агентлиги (JICA) ўртасида 10 йиллик имтиёзли даврни ўз ичига олган, 30 йил муддатда қайтариш шарти билан, 128 миллиард 246 миллион япон иенаси (1 миллиард 188 миллион 178 минг 157 доллар) миқдорида қарз битими имзоланган.
«Ўзбекистон Ташқи иқтисодий фаолият миллий банки» акциядорлик жамияти JICA томонидан ажратилган қарздан фойдаланиш учун MUFG Bank, Ltd (Япония) банки билан банклараро битим тузади.
Лойиҳани амалга ошириш муддати 5 йил (2020—2024 йиллар) этиб белгиланган бўлиб, «Иссиқлик электр станциялари» АЖ лойиҳанинг амалга оширилишини мувофиқлаштириш ва мониторинг қилиш юзасидан масъул ижро этувчи ҳисобланади.
«Навоий иссиқлик электр станцияси» акциядорлик жамияти JICA томонидан ажратилган қарз маблағларидан мақсадли ҳамда самарали фойдаланилиши юзасидан масъул ижро этувчи орган ҳисобланади.
JICAнинг қарзини қайтариш, шу жумладан, фоизларни тўлаш, комиссия тўловлари ва бошқа харажатлар билан боғлиқ тўловлар «Навоий ИЭС» АЖ маблағлари ҳисобидан амалга оширилади.
Президент қарорига мувофиқ, халқаро молия институтлари ва хорижий ҳукумат молия ташкилотлари иштирокидаги лойиҳаларни амалга ошириш доирасида солиқ ва божхона имтиёзлари тақдим қилинади.
Аввалроқ Ўзбекистон ва Тожикистон Зарафшон дарёсида ГЭС қуришни муҳокама қилаётгани ҳақида хабар берилган эди.
Изоҳ (0)