АҚШ давлат департаменти коронавирус тарқалгани сабабли фуқароларга Туркманистон ва Озарбайжонга бормасликни тавсия қилди, деб хабар бермоқда «РБК». Расмий маълумотларга кўра, Туркманистонда коронавирусга чалинганлар аниқланмаган, Озарбайжонда эса 6 киши вирус юқтиргани қайд этилган.
Туркманистонга ташриф буюрмаслик таклифи ушбу мамлакат ҳукумати томонидан коронавирус тарқалиши сабабли кўрилаётган чоралар билан изоҳланди. Америка фуқаролари барча халқаро рейслар Ашхободнинг бош аэропортидан пойтахтдан 400 километр узоқликда жойлашган Туркманобод (собиқ Чоржўй)га йўналтирилгани тўғрисида огоҳлантирилган. У ерда коронавирусга чалинганликда шубҳа қилинган тақдирда йўловчиларга маҳаллий тиббий муассасалардан бирида карантинга жойлашиш тавсия этилади.
«Туркманистондаги даволаш усуллари Америка стандартларига жавоб бермайди. Йўловчилар коронавирус билан боғлиқ бўлмаган таҳлилларни ўтказишга мажбур бўлишлари мумкин. COVID-19 билан боғлиқ бўлмаган ҳар қандай таҳлилларни топширишни рад этишни маслаҳат берамиз», — дейилади давлат департаменти хабарида.
Шунингдек, Озарбайжонда ҳам тиббий ёрдам кўрсатиш хизмати АҚШ стандартларига мувофиқ келмаслиги таъкидланган.
Аввалроқ Туркманистонда коронавирусдан бир киши вафот этгани ҳақида ОАВларда хабар тарқалгани, марҳум ҳақидаги маълумотлар қатъий сир сақланаётгани, Гурбангули Бердимуҳамедов Туркманистонда коронавирус тарқалишига йўл қўймасликка чақиргани хабар берилган эди.
ЖССТ маълумотига кўра, 6 март ҳолати бўйича дунёда коронавирус билан касалланганлар сони 100 минг нафардан ошган.
Изоҳ (0)