Россиялик сиёсатчи Алексей Навалнийнинг маълум қилишича, Москва соғлиқни сақлаш бошқармасининг дори таъминоти маркази тиббий ниқобларни чакана нархдан 2-5 баравар қимматга сотиб олган. Бу ҳақда Meduza хабар берди.
Навалнийнинг ёзишича, департамент болалар учун мўлжалланган «Берегиня» ниқобларининг битта ўрамини 472 рублдан сотиб олган. Чакана сотувда эса шундай ниқобнинг бир ўрами 207 рублдан сотилмоқда.
Сиёсатчининг маълум қилишича, уч қаватли Rutex ниқобларининг бир донаси департамент томонидан етти рублдан қиммат нархда сотиб олинган. Сил касалликлари марказий текшириш институти эса бу ниқобнинг бир донаси учун 1,34 рубль тўлайди.
Шаҳар соғлиқни сақлаш департаменти тиббий ниқоблар учун 28 февраль куни жами 200 миллион рубль сарфлаган. Фавқулодда ҳолат сабабли ниқоблар ягона етказиб берувчи — «Кит» компаниясидан сотиб олинмоқда.
Эслатиб ўтамиз, Россияда коронавирус юқтириб олиш билан боғлиқ олтита янги ҳолат аниқланди. Уларнинг бештаси Москвада қайд этилган, шу билан бирга, илк бемор тузалганлиги маълум қилинди.
Мавзуга доир: Москвада коронавирус юқтириб олган биринчи бемор тузалди
Февраль ойи охирида Италиядан қайтган эркакда коронавирус топилганлиги 2 март, душанба куни, маълум бўлди. У шифокорларга мурожаат қилган, шундан сўнг касалхонага даволаниш учун жойлаштирилган. Москва мэри Сергей Собянин коронавирус аниқлангандан сўнг 85 киши карантинга олингани, 24 киши касалхонага ётқизилгани ҳақида хабар берган эди.
Изоҳ (0)