Жаҳон соғлиқни сақлаш ташкилоти коронавирус эпидемияси тарқалгани туфайли дориларнинг етказиб берилишида узилишлар кутилаётгани юзасидан баҳолаш ишларини бошлаган. Бу ҳақда Женевада ўтган брифингда ЖССТ бош директори Тедрос Гебрейесус маълум қилган, деб ёзмоқда «РИА Новости».
«ЖССТ COVID-19 эпидемияси сабаб келажакда дориларнинг етказиб берилишида узилишлар бўлиши мумкинлиги юзасидан мониторинг ишларини олиб боради. Хитой фаол фармацевтик таркиблар ва жорий маҳсулотларнинг энг катта ишлаб чиқарувчиларидан бири ҳисобланади ва ушбу хом ашёларни бошқа мамлакатларга етказиб беради», – деган у.
Антибиотиклар, оғриқ қолдирувчи воситалар, диабет, ОИВ, сил ва безгакка қарши дорилар танқислиги кузатилиши мумкин.
Гебрейесуснинг сўзларига кўра, ЖССТ янги турдаги коронавирус билан оғриган беморларни даволашга зарур бўладиган 20 та асосий воситалар рўйхатини тузиб, нафас йўлларини сунъий вентиляция қиладиган қурилма ва кислород ускуналарини ҳам унга киритган.
«Айрим беморлардаги кислород етишмовчилиги уларни ҳаёт ва ўлим ўртасига тушириб қўйиши мумкин, баъзи мамлакатларда ушбу аппарат воситалари етишмовчилиги кузатилмоқда, бу COVID-19 билан боғлиқ вазиятни янада оғирлаштириши мумкин», – дейди Гебрейесус.
ЖССТ раҳбари ташкилотнинг касалликни аниқлаш учун 40 та янги диагностик тестларни баҳолашни бошлаганини ҳам маълум қилди. Бундан ташқари, унинг айтишича, 20 та янги вакцина ҳам ишлаб чиқиш жараёнида ва уларда клиник тадқиқотлар ўтказилмоқда.
Мавзуга доир:
Изоҳ (0)