Дунё бўйича нефть нархининг тушиши давом этмоқда. Бунга Россия ва ОПЕК мамлакатлари нефть қазиб олиш ҳажмларини қўшимча равишда қисқартириш масаласида бир қарорга кела олмаганлиги ҳақидаги хабарлар сабаб бўлмоқда, деб ёзади «РБК».
Маълум қилинишича, Brent маркали нефть нархи охирги савдолардан кейин 3,87 доллар ёки 7,74 фоизга арзонлашиб, бир баррель учун 46,12 долларни ташкил қилган.
Сўнгги марта нефть нархининг бундай кескин тушиши 2017 йилнинг 10 июлида юз берган бўлиб, ўшанда Brent маркали нефтнинг бир баррели нархи 46,11 долларгача арзонлашган.
WTI маркали нефтнинг нархи сўнгги савдолардан кейин 3,51 долларга ёки 7,82 фоизга арзонлашган ва бир баррель учун 42,31 долларни ташкил қилмоқда.
Вена шаҳрида 6 март, жума куни, ОПЕК мамлакатлари ва нефть қазиб олишни қисқартириш бўйича келишувни қўллаб-қувватлаган давлатлар вакилларининг учрашуви бўлиб ўтди. 5 март, пайшанба куни, ОПЕК мамлакатлари нефть қазиб олишни қўшимча равишда кунига 1,5 миллион баррелга қисқартиришни таклиф қилди. Шундан 0,5 миллион баррели Россия ва ОПЕК таркибига кирмайдиган бошқа давлатлар ҳиссасига тўғри келиши керак. Қайд этилишича, Россия нефть қазиб олишни қисқартириш ниятида эмас.
Ўз навбатида, ОПЕК мамлакатлари Россиянинг розилигисиз нефть қазиб олишни қисқартирмаслиги айтилмоқда.
Аввалроқ коронавирус сабабли Brent ва WTI маркаларидаги нефть нархи 2011 йилдан буён кузатилган энг катта пасайишга учраган. Нефть нархи 2,5 йил ичида илк бора 49 доллардан ҳам арзонлашган.
Изоҳ (0)