Ўзбекистонлик 18 ёшли қиз Россия пойтахти Москва шаҳрида жинсий қулликка тушиб қолди ва иккинчи уринишда у ердан қочиб, полицияга хабар беришга муваффақ бўлди. Бу ҳақда RT хабар бермоқда.
Маълум қилинишича, Россия ҳуқуқ-тартибот идоралари 18 ёшли Ўзбекистон фуқаросининг бир неча ой давомида Москвада жинсий қулликка мажбурлангани ҳақидаги аризасига биноан суриштирув олиб бормоқда.
Қизнинг айтишича, у 2019 йилнинг бошида дугонасининг таклифи билан Москвага келган. У ерда қизга дўконда сотувчилик қилиши айтилган. Аммо қиз Москвага келиши билан фоҳишалик қилишга мажбурланган.
Қайд этилишича, қиз Люблино туманидаги хонадонга олиб борилган ва бир неча ой давомида эркакларга пулли «хизмат кўрсатиши» учун ушлаб турилган.
Орадан икки ой ўтгач, қиз бу хонадондан қочишнинг уддасидан чиққан, бироқ орадан кўп ўтмай фоҳишахона ташкилотчилари уни топиб олиб, куч билан ортга қайтарган.
Қизнинг сўзларига кўра, бир нечта қиз мунтазам равишда уни калтаклаб, оиласидагиларни ўлдириб юбориш билан таҳдид қилган ҳамда эркакларга жинсий «хизмат кўрсатиш»га мажбурлаб келган.
Қиз иккинчи марта ҳам фоҳишахонадан қочишга муваффақ бўлган ва бу сафар полицияга бориб, ариза ёзган.
Хабарга кўра, қиз томонидан берилган манзилга борган полиция ходимлари у ерда Ўзбекистон фуқароси бўлган, 1990 ва 2000 йилда туғилган аёлларни қўлга олган. Айни ҳолат бўйича текширув давом этмоқда.
Изоҳ (0)