Ўзбекистон Президент Шавкат Мирзиёев 5 март, пайшанба куни, мамлакат хотин-қизларининг энг фаол ва ташаббускор вакилларидан бири — Фарғона вилояти, Олтиариқ туманидаги «Нурли обод» фермер хўжалигининг раҳбари, Ўзбекистон Қаҳрамони, Олий Мажлис Сенати аъзоси Лола Муротова билан телефон орқали мулоқотда бўлиб, яқинлашиб келаётган қутлуғ байрам билан қизғин табриклади. Бу ҳақда Президент матбуот хизмати хабар берди.
Қайд этилишича, давлат раҳбари самимий суҳбат чоғида Лола Муротованинг мамлакат қишлоқ хўжалиги ва фермерлик ҳаракати ривожига, жойлардаги ижтимоий муаммоларни ҳал қилишга қўшаётган беқиёс ҳиссасини, кўп йиллик заҳматли ва ҳалол меҳнатларини, Ватаннинг гуллаб-яшнаши йўлидаги муносиб хизматларини алоҳида таъкидлаб ўтди.
Президент Лола Муротова ўзининг қирқ йилдан ортиқ давр мобайнида бой тажрибаси, бутун билими ва куч-ғайратини мамлакат ободлиги ҳамда фаровонлигига сафарбар этгани, шунингдек, жонкуяр, камтар ва оқила ўзбек аёли сифатида ёш авлод ва бутун мамлакат хотин-қизлари учун чинакам ўрнак ва намуна бўлаётганини ҳурмат билан қайд этди.
Давлат раҳбари ҳозирги вақтда даволанишда бўлган машҳур фермерга мустаҳкам сиҳат-саломатлик ва бардамлик, ҳамиша яқинлари ардоғида бўлиб юришликни тилади.
Лола Муротова, ўз навбатида, Президентга иш жадвали тиғиз бўлишига қарамай кўрсатган чексиз ғамхўрлик ва қўллаб-қувватлашлари учун чин қалбдан ташаккур изҳор этди.
Бундай самимий илтифот ва рағбатни мамлакатнинг барча аёлларига доимий равишда кўрсатиб келинаётган юксак эҳтиромнинг ёрқин ифодаси сифатида мамнунлик билан қабул қилишини айтиб ўтди.
Давлат раҳбарининг топшириғига биноан, шу куни Олий Мажлис Сенатининг раиси Танзила Норбоева Ўзбекистон Қаҳрамони Лола Муротовани қутлуғ айём муносабати билан қутлаш ва ҳолидан хабар олиш учун Фарғона вилоятига шахсан ташриф буюрди ҳамда Президентнинг байрам совғаларини топширди.
Эслатиб ўтамиз, Лола Муротова 2019 йилда «Ўзбекистон Қаҳрамони» унвони билан тақдирланган эди. 2019 йилнинг сентябрь ойида Лола Муротова Қўқонда бўлиб ўтган Халқаро ҳунармандчилик фестивалида Ўзбекистон биринчи хоними Зироатхон Мирзиёева билан учрашган ва мулоқот қилган. Сенатор этиб сайлангач, ЎзЛиДеП Сиёсий кенгашининг 18 январь куни бўлиб ўтган йиғилишида сўзга чиққан Лола Муротова Президент аёлларга ҳокимлик лавозимини ишониб топширса, улар бу вазифани дўндириб бажаришини айтган.
Изоҳ (0)