Россия ҳукумати коронавирус сабабли 1 март кунидан бошлаб Жанубий Корея билан авиақатновларни тўхтатади. Бу ҳақда мамлакат бош вазири ўринбосари Татьяна Голикова маълум қилди, деб ёзмоқда Meduza. Унинг сўзларига кўра, «Аэрофлот» ва «Аврора» компаниялари Жанубий Кореяга парвозларни давом эттиради.

Фото: «Интерфакс»

«РБК»нинг ёзишича, Россиянинг S7 Airlines авиакомпанияси парвозларнинг чекланиши ва чекловнинг «Аэрофлот» ва «Аврора» компанияларига тааллуқли эмаслигини авиаташувлар бозорида рақобатнинг бузилиши деб атамоқда. Айни пайтда Жанубий Кореяга парвозларни «Аэрофлот», «Аврора», S7 Airlines ва «Якутия» авиакомпаниялари амалга оширмоқда.

Шунингдек, Россия расмийлари мамлакат фуқароларини Италияга сафар қилмасликка чақирмоқда. Италия билан авиақатновларни тўхтатиш режалаштирилмаяпти.

Россия 28 февралдан бошлаб Эрон фуқароларига виза беришни тўхтатади. Тақиқнинг қачонгача давом этиши номаълум.

Хитой билан авиқатновларга қўйилган чеклов камида 1 апрелгача давом этади. Шунингдек, Хитой билан чегараларни кесиб ўтишга қўйилган чеклов ҳам шу санага қадар давом этади.

Голикованинг маълум қилишича, Россия расмийларининг ихтиёрида коронавируснинг тирик штаммаси мавжуд ҳамда олимлар вакцина устида иш олиб бормоқда, шу пайтга қадар бешта намуна яратилди.

«Роспотребнадзор» раҳбари Анна Попованинг маълум қилишича, Россияда пневмония билан оғриган барча беморлар қўшимча равишда коронавирусга текширилади.

Жанубий Корея коронавирус тарқалиши бўйича Хитойдан кейинг иккинчи йирик марказга айланди. Мазкур мамлакатда коронавирус 1261 кишида аниқланган, 12 киши вафот этган. Италияда вирус билан касалланганлар сони 374 кишига етган, 12 киши вафот этган. Эрон вирус қурбонлари сони бўйича Хитойдан кейинги иккинчи мамлакат бўлди. Мамлакатда коронавирусдан вафот этганлар сони 19 кишига етган, касалликни юқтириб олганлар сони эса 139 кишига етган.

Сўнгги маълумотларга кўра, Бразилияда биринчи марта коронавирусга чалиниш ҳолати тасдиқланди. Испаниянинг Тенерифе оролидаги H10 Costa Adeje Palace меҳмонхонасида карантин эълон қилинди.

Хитой Миллий соғлиқни сақлаш комиссияси мамлакатнинг материк қисмида коронавирус инфекцияси билан касалланганлар сони 78 минг кишидан ошиб кетгани, улардан камида 29 минг нафари даволаниб, касалхонадан чиқарилганини маълум қилди. Касалликни юқтириб олиш билан боғлиқ 78 064 та тасдиқланган ҳолат қайд этилган, 29 745 кишига касалхоналардан уйига жавоб берилган, вафот этганларнинг умумий сони эса 2715 кишига етган.