Туркия ҳукумати Дажла дарёси бўйида жойлашган 12 минг аҳоли истиқомат қиладиган Ҳасанкайф шаҳрини сувга ғарқ қилади — бу ерда янги гидроэлектр станция (ГЭС) қурилиши якунига етмоқда. Шаҳар билан бирга археологик ёдгорлик, яқин атрофдаги қишлоқ ва бошқа аҳоли манзилгоҳлари ҳам сув остида қолади, дея хабар бермоқда «Gazeta.uz».
«Илису» тўғони деярли қуриб битказиб бўлинган. Сув омбори 20 фоизга тўлдирилган, Жануби-Шарқий Онадўлини ривожлантириш бўйича ҳукуматнинг кенг миқёсли лойиҳаси доирасида бунёд этилган ГЭС 2020 йил март ойида ишга тушади. Режа бўйича, у мамлакатдаги жами электр энергиясининг 4 фоизини ишлаб чиқаради.
Дарёнинг қарама-қарши соҳилида 760 та намунавий уй, масжид, мактаб, савдо маркази ва музей аллақачон қуриб, битказиб бўлинган. Маҳаллий аҳолининг аксарияти — бу жойларда асосан курдлар яшайди — ўз уйларини тарк этиб бўлган. Бироқ айрим фуқаролар кўчириладиганлар рўйхатига кирмаган ва энди улар қаерда яшашини билмаяпти.
Туркия ва Ироқнинг ўнлаб жамоат ташкилотлари ушбу ГЭСнинг қурилишига қарши чиқмоқда. Фаоллар ва экологларнинг норозилик намойишлари сабаб европалик инвесторлар ушбу лойиҳада қатнашишдан бош тортган.
Айни вақтда Инсон ҳуқуқлари бўйича Европа суди Ҳасанкайфни сақлаб қолиш бўйича мурожаатномани рад этди. Страсбургдаги судьялар Ҳасанкайфни маданий мерос объекти сифатида маъмурий қарорлардан асраб қолиш учун етарлича асослар топа олмаган.
Экспертларнинг фикрича, тўғон 4000 та ғордан иборат ерости шаҳрига, шунингдек, минтақа экотизимига тузатиб бўлмас зарар етказади. Ҳар йили юз минглаб сайёҳлар Ҳасанкайфдаги археологик ёдгорликларни томоша қилиш учун келарди. Ҳукумат мавжуд тарихий меросдан фақат саккизта объектни кўчириб ўтказишга қарор қилган.
Изоҳ (0)