Бразилия шимоли-шарқидаги Сеара штатида ҳарбий полиция томонидан иш ташлаш бошланганидан буён ўлим билан якунланган жиноятлар сони 170 тага етди. Бу ҳақда G1 порталига таяниб, «ТАСС» хабар бермоқда.
Портал маълумотларига кўра, 23 февраль, якшанба куни, 25 киши, 24 февраль, душанба куни эса 23 киши ҳалок бўлган. Сеарада қотилликлар сони 19 февралдан ошишни бошлаган ва ҳарбий полиция иш ташлаган кунга тўғри келган.
Биргина биринчи куннинг ўзидаёқ бу кўрсаткич йил бошидаги ўртача кўрсаткичдан қарийб беш баравар юқори бўлган. Ҳарбийларнинг бир ҳафта давом этган 2012 йилги шундай ҳаракатлари билан солиштирганда, қотилликлар сони 37 фоизга ортган.
Шу сабабли тўққизта штат раҳбарлари мамлакат бўйлаб сешанба куни якунланадиган карнавалга бағишланган кўнгилочар тадбирларни бекор қилган.
Душанба куни Сеара шаҳрига ташриф буюрган Бразилия адлия ва жамоат хавфсизлиги вазири Сержиу Мору вазият расмийлар назорати остида эканлигини айтган. «Айрим оғир жиноят турларининг кўпайганига қарамай, кўчаларда бутунлай тартибсизлик ҳукм сурмоқда, деб бўлмайди», — деган у.
Хабарда айтилишича, ҳукумат аллақачон фитна уюштирганларнинг бир қисмини аниқлаган бўлиб, улар органдан ишдан олиниб, қонунга мувофиқ жазоланади. Иш ташлашда қатнашганлиги учун 230 нафар полициячи хизматдан четлаштирилган, яна 77 киши қочоқ деб эълон қилинган, улардан 43 нафари ҳибсга олинган.
Изоҳ (0)