COVID-19 коронавируси эпидемияси муносабати билан Туркманистон президенти Гурбангули Бердимуҳамедов йиғилиш ўтказиб, унда Туркманистон фуқароларининг сайёҳлик, маданий, спорт ва бошқа мақсадлар учун чет элга ташрифларини назорат қилишни, шунингдек, мамлакатга кирувчи фуқароларни текшириш вазифасини топширди. Бу ҳақда TDH хабар бермоқда.
Унда бош вазир ўринбосари, Касалликларнинг тарқалишига қарши курашиш бўйича фавқулодда комиссия раиси Пурли Оғамуродов ва соғлиқни сақлаш ва тиббий саноат вазири Нурмуҳаммад Аманнепесов иштирок этган.
Оғамуродовнинг хабар беришича, Туркманистонга ташриф буюрувчи чет элликларга назорат ва карантин жорий этилган бўлиб, туркманистонликларнинг ушбу касаллик ўчоғи қайд этилган мамлакатларга чиқиши чекланган.
Аэропортларда, чегара ҳудудларида, денгиз, автомобиль ва темир йўл йўлларида, санитария-карантин пунктлари ва бўлимларида тун-у кун навбатчилик ва тиббий кўрик ўтказилмоқда.
Бош вазир ўринбосарининг сўзларига кўра, юқтириш ҳолатлари қайд этилган мамлакатлардан келган фуқаролар «шифокорлар қатъий назорати остида турибди». Шунингдек, президент топшириғига кўра, импорт қилинган озиқ-овқат маҳсулотлари ҳам қаттиқ назоратдан ўтказилмоқда. Соғлиқни сақлаш ва тиббий саноат вазирининг сўзларига кўра, Туркманистонда коронавирус инфекцияси қайд этилмаган.
Хабарда айтилишича, Гурбангули Бердимуҳамедов Жаҳон соғлиқни сақлаш ташкилотининг пандемия хавфи башорат қилинган маълумотларидан келиб чиқиб, хавфли инфекцияга ишончли тўсиқ қўйиш ва туркманистонликларнинг соғлиғини ҳимоя қилиш учун ҳар қандай вазиятга тайёр бўлиш кераклигини таъкидлаган. Шу сабабли профилактика тадбирларини кучайтириш учун тизимли равишда тегишли назоратни амалга ошириш кераклигини айтган.
Аввалроқ Туркманистонда коронавирусдан бир киши вафот этгани ҳақида ОАВларда хабар тарқалгани, марҳум ҳақидаги маълумотлар қатъий сир сақланаётгани хабар берилган эди.
Изоҳ (0)