Oxford Economics таҳлилий марказининг маълумотларига кўра, янги турдаги коронавируснинг тарқалиши сабабли жаҳон ЯИМнинг йўқотишлари 2020 йилда 1,1 триллион долларга етиши мумкин. Бу ҳақда «РБК» хабар берди.
Қайд этилишича, мазкур йўқотиш жаҳон ЯИМнинг 1,3 фоизга пасайишини англатади Oxford Economics ҳисоботида айтилишича, янги коронавирус сабабли келиб чиққан пневмония глобал пандемияга айланса, тахмин қилинган йўқотиш миқдори амалда юз бериши мумкин.
Маълум қилинишича, агар пандемиянинг чегаралари фақат Осиё билан чекланса, жаҳон ялпи ички маҳсулотининг пасайиши 0,4 триллион долларни ёки 0,5 фоизни ташкил этади.
Марказ сценарийсига кўра, истеъмолнинг камайиши, шунингдек, туризм ва саёҳатлар соҳасидаги йўқотишлар натижасида таъсирланган молиявий бозорлар ва инвестицияларнинг камайиши натижасида глобал ЯИМ пасайиши кузатилади.
Марказ томонидан қайд этилишича, Хитой ялпи ички маҳсулотининг ўсиши вируснинг тарқалиши сабабли 2020 йилда 6 фоиздан 5,4 фоизгача пасаяди.
Маълумот учун, Коронавирус туфайли дунёнинг энг бой одамлари бир кунда 139 миллиард доллар йўқотди, Ўзбекистоннинг асосий экспорт маҳсулоти — олтиннинг нархи рекорд даражада кўтарилди. Samsung коронавирус билан касалланган ходим сабабли Жанубий Кореядаги корхоналаридан бирини ёпди. Аввалроқ миллиардер Уоррен Баффетт коронавируснинг тарқалиши ва унинг жаҳон бозорига таъсири ҳақида фикр билдирган эди.
Бир қатор халқаро биржаларда котировкалар пасайиши кузатилган. Халқаро экспертларнинг коронавируснинг жаҳон иқтисодиётига таъсири билан боғлиқ хавотирлари касаллик Италия, Жанубий Корея ва Эронда кенг тарқала бошлагандан кейин кучайди.
24 февраль куни Лондон фонд биржаси индекси FTSE 100 3,3 фоизга, Германиянинг Dax фонд биржаси 4 фоизга, Италиянинг FTSE Mib биржаси 4,5 фоизга, Франциянинг CAC 40 биржаси эса 5 фоизга тушган. Американинг S&P 500 фонд индекси ва Dow Jones саноат индекси 3 фоиздан ортиқ йўқотган, Гонконгнинг Hang Seng фонд биржаси 1,79 фоизга, Япониянинг Nikkei фонд биржаси эса 0,39 фоизга тушган.
Brent маркали нефтнинг нархи 3,5 фоизга азонлашиб, бир баррел учун 56,5 долларгача тушган. WTI маркали нефтнинг нархи эса 3,2 фоизга арзонлашиб, бир баррель учун 51,7 долларни ташкил қилган.
Изоҳ (0)