Oxford Economics tahliliy markazining ma'lumotlariga ko‘ra, yangi turdagi koronavirusning tarqalishi sababli jahon YaIMning yo‘qotishlari 2020-yilda 1,1 trillion dollarga yetishi mumkin. Bu haqda “RBK” xabar berdi.
Qayd etilishicha, mazkur yo‘qotish jahon YaIMning 1,3 foizga pasayishini anglatadi Oxford Economics hisobotida aytilishicha, yangi koronavirus sababli kelib chiqqan pnevmoniya global pandemiyaga aylansa, taxmin qilingan yo‘qotish miqdori amalda yuz berishi mumkin.
Ma’lum qilinishicha, agar pandemiyaning chegaralari faqat Osiyo bilan cheklansa, jahon yalpi ichki mahsulotining pasayishi 0,4 trillion dollarni yoki 0,5 foizni tashkil etadi.
Markaz ssenariysiga ko‘ra, iste’molning kamayishi, shuningdek, turizm va sayohatlar sohasidagi yo‘qotishlar natijasida ta'sirlangan moliyaviy bozorlar va investitsiyalarning kamayishi natijasida global YaIM pasayishi kuzatiladi.
Markaz tomonidan qayd etilishicha, Xitoy yalpi ichki mahsulotining o‘sishi virusning tarqalishi sababli 2020-yilda 6 foizdan 5,4 foizgacha pasayadi.
Ma’lumot uchun, Koronavirus tufayli dunyoning eng boy odamlari bir kunda 139 milliard dollar yo‘qotdi, O‘zbekistonning asosiy eksport mahsuloti — oltinning narxi rekord darajada ko‘tarildi. Samsung koronavirus bilan kasallangan xodim sababli Janubiy Koreyadagi korxonalaridan birini yopdi. Avvalroq milliarder Uorren Baffett koronavirusning tarqalishi va uning jahon bozoriga ta’siri haqida fikr bildirgan edi.
Bir qator xalqaro birjalarda kotirovkalar pasayishi kuzatilgan. Xalqaro ekspertlarning koronavirusning jahon iqtisodiyotiga ta’siri bilan bog‘liq xavotirlari kasallik Italiya, Janubiy Koreya va Eronda keng tarqala boshlagandan keyin kuchaydi.
24-fevral kuni London fond birjasi indeksi FTSE 100 3,3 foizga, Germaniyaning Dax fond birjasi 4 foizga, Italiyaning FTSE Mib birjasi 4,5 foizga, Fransiyaning CAC 40 birjasi esa 5 foizga tushgan. Amerikaning S&P 500 fond indeksi va Dow Jones sanoat indeksi 3 foizdan ortiq yo‘qotgan, Gonkongning Hang Seng fond birjasi 1,79 foizga, Yaponiyaning Nikkei fond birjasi esa 0,39 foizga tushgan.
Brent markali neftning narxi 3,5 foizga azonlashib, bir barrel uchun 56,5 dollargacha tushgan. WTI markali neftning narxi esa 3,2 foizga arzonlashib, bir barrel uchun 51,7 dollarni tashkil qilgan.
Izoh (0)