Халқаро валюта жамғармасининг (ХВЖ) бошқарувчи директори Кристалина Георгиева Хитойда коронавирус тарқалиши шароитида жаҳон иқтисодиётини ривожлантиришнинг иккита варианти ҳақида маълум қилди. Бу ҳақда ташкилот матбуот хизмати хабар берди.
Январь ойида жамғарма 2020 йилда глобал иқтисодиёт ўтган йилга нисбатан 3,3 фоизга ўсишини прогноз қилган. Бироқ коронавирус Хитойда бизнес фаоллигининг пасайишига олиб келди.
Георгиеванинг сўзларига кўра, таклиф қилинган асосий сценарий бўйича, агар эпидемия тарқалиши секинлашса ва иккинчи чоракда Хитой иқтисодиёти нормал ҳолатга қайтадиган бўлса, глобал иқтисодиётга таъсир минимал ва қисқа муддатли бўлади. Бу ҳолда йил давомида глобал иқтисодий ўсиш 3,2 фоизни ташкил қилади.
Жамғарма раҳбарининг қайд этишича, энг ёмон сценарий ҳам кўриб чиқилмоқда. Вирус бутун дунё бўйлаб тарқалишини давом эттирса, бу иқтисодий ўсиш учун узоқ давом этадиган салбий оқибатларга олиб келади.
Жамғарма раҳбари коронавирус ва унинг иқтисодий оқибатларига қарши туриш учун учун халқаро ҳамкорлик зарурлигини таъкидлади. «Соғлиқни сақлаш тизими кам ривожланган давлатлар учун хавф-хатарни англаб етиш вақти келди», — деди жамғарма директори.
Георгиеванинг қўшимча қилишича, ХВЖ бундай давлатларга кредит беришга тайёр.
Аввалроқ Европа иттифоқи коронавирусга қарши кураш учун 232 миллион евро ажратишини маълум қилган эди. Трамп администрацияси коронавирусга қарши кураш учун давлат бюджетидан 1 миллиард доллар олмоқчи эканлиги маълум бўлди.
Бундан ташқари, АҚШ коронавирус қайд этилган Хитой ва бошқа мамлакатларга 100 миллион доллар ажратиши маълум қилинган эди. Хитой Молия вазирлиги эса коронавирусга қарши курашиш учун қарийб 3,9 миллиард доллар миқдорида маблағ ажратди. Қозоғистон эса мазкур вирус билан курашиш учун 9,2 миллион доллар маблағ ажратганини маълум қилди.
Шунингдек, Билл Гейтс Хитойдаги коронавирус билан курашишга 5 миллион доллар ажратди. Dell, PepsiCo ва Microsoft Хитойда коронавирусга қарши курашишда ёрдам беришини маълум қилди. Хитойлик актёр Жеки Чан коронавирусга қарши вакцина яратган инсонга 143 минг доллар ваъда қилган.
Хитой Соғлиқни сақлаш миллий комиссияси мамлакатда ўтган бир сутка давомида COVID-19 коронавируси оқибатида вафот этганлар 71 кишини (уларнинг аксарияти Хубэй провинциясидан) ташкил этиб, жами вафот этганлар сони 2663 кишига етганини маълум қилди. Қайд қилинишича, Хитойда 24 февраль, душанба куни, вирусни юқтириб олиш бўйича 508 та ҳолат аниқланган, 2589 киши даволанишга муваффақ бўлгани айтилмоқда. Бугунга келиб, инфекциядан жами 27 230 киши даволанишга муваффақ бўлган, бутун Хитой бўйлаб 641 минг одам текширувлардан ўтказилган бўлиб, касалликка чалинганлар 77 мингдан ортиқ одамни ташкил қилмоқда.