Испаниянинг Тенерифе оролида коронавирус юқтириб олган меҳмон сабабли ичида минг киши бўлган меҳмонхона изоляция қилинди

Испаниянинг Тенерифе оролида жойлашган ва ичида тахминан минг киши бўлган H10 Costa Adeje Palace меҳмонхонаси соғлиқни сақлаш органлари томонидан изоляция қилинди. Бу ҳақда Meduza хабар берди.

Маълум бўлишича, меҳмонхонада бир ҳафтадан буён яшаётган Италия фуқаросида 24 февраль, душанба куни, коронавирус аниқлангач, меҳмонхонадан сайёҳларни чиқариш тўхтатилган. Испания расмийлари касалланган киши билан алоқада бўлган барча кишиларни текширмоқда.

Аввалроқ Испанияда уч кишида коронавирус аниқлангани ҳақида хабар берилган эди.

Дунё бўйича коронавирусни юқтириб олганлар сони 25 февраль ҳолатига кўра, 80 минг кишидан ошиб кетди, қурбонлар сони эса 2700 кишига етди. Европада касаллик тарқалишининг энг йирик маркази Италияда жойлашган бўлиб, у ерда 229 та ҳолат қайд этилган, етти киши вафот этган.

Эслатиб ўтамиз, Diamond Princess круиз кемаси Япониянинг Йокогама портида 4 февралдан бери карантинда турибди. Кемада вирус тарқалаётгани 1 февраль куни Гонконгда тушиб қолган 80 ёшлик йўловчида янги турдаги вирус аниқланганидан сўнг маълум бўлган эди. Кемада жами 3,7 минг киши бўлган, уларнинг 600 нафарига коронавирус ташхиси қўйилган.

19 февраль, чоршанба куни, кемадаги сайёҳларнинг дастлабки гуруҳига кемадан соҳилга тушишга рухсат берилди. Шу куни кемани тарк этган 500 нафар йўловчининг 300 дан ортиғи АҚШ фуқаролари эди. Лайнернинг барча соғлом йўловчиларини 21 февралга қадар эвакуация қилиш режалаштирилган эди.

Соҳилга тушган йўловчилар орасида вирусни ташувчилар борлиги ҳақида аввалроқ Австралия ҳукумати маълум қилган эди. Таҳлиллар ушбу мамлакатнинг кемада бўлиб, сўнг ватанга қайтган икки фуқаросида коронавирус борлигини кўрсатган эди. Шунингдек, кемадан эвакуация қилинган 11 нафар америкаликда ҳам коронавирус аниқланган. Сўнгги маълумотларга кўра, кемада текширувдан ўтказилган 691 кишида коронавирус аниқланган, 4 киши вафот этган.