АҚШ разведкаси Россиянинг 2020 йилда ўтказиладиган президентлик сайловларига аралашувини бўрттириб юборди. Бу ҳақда CNN телеканали ўзининг учта манбасига таяниб хабар қилди.
Аввалроқ АҚШ разведка директори ёрдамчиси Шелби Пирсон Конгресснинг вакиллар палатаси разведка бўйича қўмитасига Россия Дональд Трампнинг қайта президент этиб сайланишига кўмаклашиш мақсадида Америка сайлов кампаниясига аралаша бошлагани ҳақида маълум қилганди.
Манбаларнинг сўзларига кўра, АҚШда Россиянинг президент Дональд Трампнинг қайта сайланишига аралашуви ҳақда далил-исбот йўқ. Таъкидланишича, разведка буни тасдиқламайди.
«Россия президент улар билан ишлаши мумкин бўлган шахс — у музокарачи эканлигини тушунади», — дейди юқори мартабали амалдорлардан бири. Яна бир манбанинг қайд этишича, Пирсон хонимнинг Россияни сайловларга аралашуви тўғрисидаги қарашлари чалкашликка олиб келмоқда. Мамлакат миллий хавфсизлик вакилларидан бирининг фикрича, Россиянинг ҳозирда ягона мақсади — АҚШда низо келтириб чиқариш.
Эслатиб ўтамиз, Америка махсус хизматларининг фикрича, Россия расмийлари 2016 йилда АҚШ президенти сайлови жараёнига аралашув кампаниясини уюштирган. Расмий Москва ушбу айбловни қатъий рад этиб келади. Шунингдек, АҚШда Дональд Трампнинг сайловолди штабининг Россия билан алоқалари бўлган, деб тахмин қилинади, бироқ АҚШ махсус прокурори Роберт Мюллер олиб борган суриштирув бу тахминни тасдиқламади.
Изоҳ (0)