Италия расмийлари мамлакатда янги турдаги коронавирус билан касалланиш ҳолатлари кескин кўпайганлагини маълум қилди. 23 февраль оқшомига келиб Италия янги вирусни юқтириб олиш билан боғлиқ 152 та ҳолат аниқланган, улардан уч нафари вафот этган. 26 беморнинг аҳволи оғир. Италия COVID-19 нинг Европадаги энг катта ўчоғига айланди.
Вирус Италия шимолида, асосан Ломбардия ва Венето маъмурий вилоятларида тарқалган. Шунингдек, Эмилия-Романя, Лацио ва Пемонт вилоятларида ҳам касалланганлар борлиги айтилмоқда.
Кўплаб шаҳарларда қатъий чеклов чоралари кўрилмоқда, касалликдан жабрланган ҳудудлар карантинга ёпилмоқда. Мактаб ва университетларда машғулотлар бекор қилинмоқда, турли жамоат тадбирлари, хусусан, спорт мусобақалари тўхтатилган. Аввалроқ футбол бўйича Италия А Сериясининг бир неча учрашувлари қолдирилгани маълум бўлган эди. Ломбардияда черков ва ибодатхоналарда барча диний маросимлар тўхтатилган.
Модалар ҳафталиги бўлиб ўтадиган Миланда Армани модалар уйи 23 февралги намойишни томошабинларсиз, ёпиқ эшиклар ортида ўтказишини маълум қилган эди. Тадбир модалар уйининг сайти орқали трансляция қилинди. «Ла Скала» театри эса якшанба кунидан бошлаб барча спектакллар намойишлари бекор қилинганини эълон қилди.
Венецияда ҳар йили анъанавий тарзда ўтказиладиган Венеция карнавали муддатидан аввал тугатилди. Режалаштирилган тадбирлар фақат якшанба куни ўтказилди. Шаҳардаги бошқа барча тадбирлар март ойи бошига қадар қолдирилган.
Италия 2019 йил декабридан бери COVID-19 коронавируси эпидемиясига қарши курашаётган Хитой билан авиақатновларни тўхтатган. Касаллик тарқала бошлаганидан бери Хитойда 77 мингдан ортиқ одам вирусни юқтириб олди, салкам 2,6 минг киши вафот этди. Хитойдан ташқари Япония ва Жанубий Корея ҳам коронавируснинг йирик ўчоқларига айланган.
Японияда 750 дан ортиқ одам, асосан Йокогама портида турган Diamond Princess круиз лайнери йўловчилари касалланган. Уч нафар йўловчи вафот этган. Жанубий Кореяда эса сўнгги бир суткада касалланганлар сони 161 кишига кўпайиб, 763 кишига етган. Шунингдек, Эронда 43 киши касалланиб, етти киши вафот этган — мамлакат қурбонлар сони бўйича Хитойдан сўнг иккинчи бўлиб қолди.