AQSh Senatining razvedka bo‘yicha qo‘mitasi Kremlni 2016-yilgi saylovlarda Trampga yordam berganlikda aybladi

AQSh Senatining razvedka bo‘yicha qo‘mitasi 2016-yili AQShda o‘tkazilgan prezidentlik saylovlariga Rossiya hukumati tomonidan qo‘llab-quvvatlangan “trollar fabrikasi” ta’sir ko‘rsatgani to‘g‘risida 85 varaqli hisobotni e’lon qildi, deb xabar beradi Meduza.

Senatorlar “trollar fabrikasi” ijtimoiy tarmoqlar orqali saylov jarayonlariga ta’sir qilib, Donald Trampni qo‘llab-quvvatlagan va Hillari Klintonning kampaniyasiga xalaqit bergan. Hisobot mualliflarining ta’kidlashicha, Kreml “trollar fabrikasi”ning faoliyatiga sezilarli darajada ta’sir o‘tkazgan.

Hisobotda ta’kidlanishicha, AQShda 2020-yili bo‘lib o‘tadigan prezidentlik saylovlari oldidan Rossiya hukumati yana ovoz berish jarayonlariga ta’sir o‘tkazishga urinib ko‘rishi mumkin.

Mazkur hisobot AQSh razvedka bo‘yicha qo‘mitasining 2016-yilgi saylovlarga bag‘ishlangan hisobotining ikkinchi qismi hisoblanadi. Birinchi qismida senatorlar Rossiya saylovlarga aralashishga harakat qilgani, biroq uning natijasiga ta’sir o‘tkaza olmagani borasida to‘xtamga kelgan edi.

Rossiya hukumati bir necha bor AQShdagi 2016-yili o‘tkazilgan prezidentlik saylovlariga aloqasi yo‘qligini ta’kidlagan. Shuningdek, Donald Tramp ham o‘zining g‘olib chiqishida Rossiyaning aloqasi borligini rad etgan.