Уоррен Баффетт компанияси инвесторларига ёзган хатида ўлишга тайёргарлик кўриб қўйганини маълум қилди

2019 йилда Berkshire Hathaway инвсетиция компаниясининг соф фойдаси 81 миллиард долларни ташкил қилган ва 2018 йилдагига нисбатан 1900 фоизга ўсган. Бу ҳақда корпорация ижрочи директори Уоррен Баффетт инвесторларга ёзган хатида маълум қилган, деб ёзмоқда «РБК».

Баффеттнинг ёзишича, бундай ўсиш 2018 йилда жорий этилган янги GAAP (Generally Accepted Accounting Principles — умумқабул қилинган бухгалтер ҳисоби принципи) қоидаларига боғлиқ. Уларга кўра, қимматли қоғозларга эга бўлган компанияларга соф фойдани уларнинг қийматига мувофиқлаштириб ёзиши лозим.

Баффетт 2018 йилда холдинг 4 миллиард доллар (бир йил аввал 45 миллиард бўлган) соф фойда қилганини эслатган.

Баффетт инвесторларга ёзган хатида ҳисобот беришнинг янги қоидаларига рози эмаслиги ва 2018 йилдаги операцион даромад паст бўлгани, бу борада 2018 йилдаги натижани такрорлашга ҳаракат қилиш лозимлигини қайд этган. 2019 йилда операцион даромад 23,9 миллиард долларни, 2018 йилда эса 24,8 миллиард долларни ташкил этган, дейилади Yahoo Finance хабарида.

Август ойида 90 га чиқадиган Баффетт хатида аксионерни безовта қилаётган муаммо ҳақида ёзмаган, яъни ижрочи директор лавозимидан ўзидан кейин ким раҳбар бўлиши хусусида қайд этмаган. У яқин орада нафақага кетмаслиги ва агарда вафот этадиган бўлса, холдинг бунга 100 фоиз тайёрлаб қўйилганини билдирган.

Баффеттнинг сўзларига кўра, Berkshire инвесторларига уч талабга жавоб берадиган корхоналарга инвестиция киритишни тавсия қилди. Биринчи навбатда яхши даромад қилиш лозим, иккинчидан, уларни ҳалол ва ишбилармон менежерлар бошқариши лозим. Ваниҳоят, учинчи шарт — улар билан келишув ҳар томонлама пишиқ ишланиши керак. Холдинг бундай талабларга жавоб берадиган корхонани топганида уларни тўлиғича сотиб олиши лозим, дейилади Баффетт мактубида.

«Беқарор фонд бозори бизга улкан, лекин назорат қилинмайдиган оммавий компаниялар акциялар улушини харид қилиш имконини беради, бу бизнинг стандартларга мос келади», — дейди у.

Баффетт Berkshire Hathaway, GEICO, Dairy Queen, Duracell, BNSF Railway компанияларига эгалик қилади, шунингдек, Apple, American Express ва Bank of America’да ўз улушларига эга. Forbes Баффеттнинг бойлигини 90,2 миллиард долларга баҳолаган.