Samsung коронавирус билан касалланган ходим сабабли Жанубий Кореядаги корхоналаридан бирини ёпди

Samsung Electronics Жанубий Кореядаги корхоналаридан биридаги ходими коронавирус билан касаллангани тасдиқлади. Бу ҳақда Reuters хабар бермоқда.

«22 февраль куни Gumi Complex’да ишловчи Samsung Electronics ходимида янги коронавирус (COVID-19) аниқланди», — дейилади хабарда.

Мазкур завод 24 февраль, душанба куни, эрталабгача, ходим ишлаган қават эса 25 февралгача ёпиқ бўлади. Бу вақт мобайнида компания хоналарни дезинфекция қилиш ишларини олиб боради.

Шунингдек, компания вирусни юқтирган ҳамкасблари билан алоқада бўлган ходимларини ҳам алоҳида ажратишга қарор қилди.

Жанубий Кореяда янги коронавирус инфекциясини юқтириб олиш билан боғлиқ 204 та ҳолат аниқланди. Мамлакат касалланиш кўлами бўйича Хитой (у ерда 75 мингдан ортиқ киши касалланган) ва Япониядан (у ерда 700 дан зиёд коронавирус бемори бор) сўнг эпидемиянинг жаҳондаги учинчи энг йирик ўчоғига айланди. Ҳафта бошида ҳам Жанубий Кореяда янги вирус билан хасталанганлар сони 30 кишидан камроқ эди, аммо пайшанба куни уларнинг сони 100 кишига етди, жума куни эса 200 кишидан ошиб кетди. Пойтахт Сеулдан 300 километр масофада жойлашган ва 2,4 миллион аҳоли истиқомат қиладиган Тегу шаҳри COVID-19 нинг бош ўчоғига айланган.