Шавкат Мирзиёев Туркия президенти ҳузуридаги Халқ кутубхонасининг очилиш маросимида иштирок этди (фото)

Ўзбекистон Президенти Шавкат Мирзиёев 20 февраль, пайшанба куни, Анқара шаҳрида Туркия президенти ҳузуридаги Халқ кутубхонасининг очилиш маросимида иштирок этди. Бу ҳақда Президент матбуот хизмати хабар берди.

Маълум қилинишича, ушбу мажмуа Туркия раҳбари Ражаб Тоййиб Эрдўғон ташаббуси билан бунёд этилган. Маҳобатли кутубхона китоб фонди (4 миллион босма нашр ва 120 миллиондан зиёд электрон файл) ҳамда хизмат даражаси бўйича дунёдаги энг улканларидан бири ҳисобланади. Ушбу маънавий кутубхона президент қароргоҳи — Жумҳурбашканлиги саройи ёнида қурилгани ҳам унинг аҳамиятини кўрсатади, дейилади хабарда.

Очилиш маросимида бутун дунёдан икки мингга яқин меҳмонлар — олимлар, ёзувчилар, таълим ва маданият намояндалари, давлат ва жамоат арбоблари қатнашди. Шавкат Мирзиёев Туркия президенти томонидан таклиф этилган олий даражадаги ягона меҳмон бўлди.

Маросимда Президент Шавкат Мирзиёев нутқ сўзлади. Ўзбекистон раҳбари шундай муҳим ва шукуҳли воқеага таклиф учун миннатдорлик билдириб, қардош турк халқини ушбу илм-маърифат маскани билан муборакбод этди.

«Дунёдаги ҳар қайси давлат, ҳар қайси халқ биринчи навбатда ўзининг интеллектуал салоҳияти, юксак маънавияти билан қудратлидир. Бундай енгилмас куч манбаи эса аввало инсоният тафаккурининг буюк кашфиёти — китоб ва кутубхоналарда», — деди Шавкат Мирзиёев.

Давлат раҳбари Ўзбекистонда замонавий мактаблар, илмий-маърифий марказлар ташкил этилаётганини таъкидлади.

Самарқандда Имом Бухорий, Сурхондарёда Имом Термизий номидаги халқаро илмий-тадқиқот марказлари, шунингдек, ҳадис, калом, ақийда, тасаввуф, фиқҳ мактаблари очилган. Тошкент шаҳрида кўп асрлик маърифат хазинасини намоён этадиган, фундаментал тадқиқотлар олиб бориладиган Ислом цивилизацияси маркази бунёд этилмоқда.

Таъкидланишича, 2020 йилда улуғ алломалар Абдухолиқ Ғиждувоний ва Баҳоуддин Нақшбанд таваллудларига бағишланган тадбирлар ўтказилади. Маҳмудхўжа Беҳбудий туғилганининг 145 йиллик санаси нишонланади. Шунингдек, 2020 йилда Бухоро шаҳри Ислом маданияти пойтахти, Хива шаҳри Туркий дунё маданияти пойтахти деб эълон қилингани муносабати билан бир қатор халқаро анжуманлар ташкил этилиши режалаштирилган.

Ўзбекистон Президенти туркиялик олимлар, адабиётшунос ва диншуносларни ушбу маданий-маърифий тадбирларга таклиф этди. Ўзбекистоннинг китоб фондларида 100 мингдан зиёд ноёб қўлёзма асарлар сақланаётгани, уларнинг аксарияти ўз тадқиқотчиларини кутаётганини таъкидлади.

Туркия президенти ушбу қувончли айёмда Ўзбекистон Президенти рафиқаси билан бирга иштирок этаётгани учун ташаккур изҳор этди.

«Ўзбекистон биз учун маданий тасаввуримизни шакллантирган, олимларни етиштирган, илм, ирфон ва маънавий дунёмизни таъминлаган ҳаётий манбаларимиздан энг муҳимидир. Илм муҳити асрлар давомида Тошкент билан Анқара, Самарқанд билан Конё, Бухоро билан Бурса, Хива билан Эдирнени боғлаб, ўзаро бойитган. Бу кун Халқ кутубхонасини Жаноби олийлари билан биргаликда очиб, муштарак маданиятимиз ҳақида бутун дунёга муҳим бир ишора бермоқдамиз», — деди Ражаб Тоййиб Эрдўғон.

Шавкат Мирзиёев дунёда ўта ноёб бўлган «Усмон Мусҳафи»нинг хаттотлар томонидан кўчирилган нусхаси, Жалолиддин Румийнинг машҳур «Маснавий» асари ҳамда Абу Бакр ар-Розийнинг «Касалликлар тарихи» асари қўлёзмаларининг факсимиле нусхалари, «Алишер Навоий асарларининг Истанбул кутубхоналаридаги тасвирий нусхалари» номли китоб-альбом, Юнус Эмро шеърларининг ўзбек тилига таржимаси жамланган «Ўлмас кўнгул» деб номланган китобларни кутубхонага туҳфа қилди.

Шунингдек, Туркия президенти ҳузуридаги Халқ кутубхонасига 350 дан зиёд турли мавзудаги китоблар тақдим этилди.