Ўзбекистон Марказий банки «Анор» тезкор тўловлар тизимини ишлаб чиқди. Ушбу янги тизим юридик шахслар ва якка тартибдаги тадбиркорлар ўртасида реал вақт режимида банклараро пул ўтказмаларини амалга ошириш имконини беради ва узлуксиз ишлайди. Бу ҳақда Марказий банк хабар берди.
Маълум қилинишича, «Анор» тизими веб-сервислар технологияси асосига қурилган ва электрон рақамли имзо орқали фойдаланилади. Бу тизим тўловчиларга масофадан туриб банклараро тўловларни амалга оширишга шароит яратади. Бундан ташқари, банкка ташриф буюришга эҳтиёж қолмайди ва ҳисобвараққа маблағ реал вақт режимида тушади, ундан ўша вақтнинг ўзида фойдаланиш имконияти вужудга келади.
Мазкур тизим Марказий банк томонидан 2019 йил охирида ишлаб чиқилиб, тажриба тариқасида 2020 йил 18 февралдан ишга туширилди ҳамда «Ҳамкорбанк», «Трастбанк», «Ипотека банк» ва «Туркистонбанк» каби тижорат банкларида синовдан ўтказилмоқда. Дастлабки икки кун давомида ушбу тизим орқали мингдан ортиқ қарийб 20 миллиард сўмлик тўловлар амалга оширилди.
Маълум қилинишича, 2020 йилнинг февраль март ойларида республиканинг бошқа банклари ҳам босқичма-босқич равишда «Анор» тизимига уланади.
Изоҳ (0)