Андижон вилояти Асака туманида ўз эрини ўлдириш учун 50 минг долларга одам ёллаган аёл қўлга олинди. Бу ҳақда «Дарё»га Бош прокуратура томонидан маълум қилинди.
Хабар берилишича, тадбиркорлик билан шуғулланувчи 1984 йилда туғилган аёл О.Д. 9 февраль, якшанба куни, соат 21:00 да Асака туманидаги «Гумбаз» кафеси олдида фуқаро А.А. билан кўришган. Аёл А.А.га турмуш ўртоғи А.Ш.ни ўлдириш эвазига 50 минг доллар ваъда қилиб, олдиндан 6000 доллар берган.
Шунингдек, О.Д. фуқаро А.А.нинг таниши Ж.Э. билан Асака шаҳридаги 55-сонли мактаб олдида кўришиб, А.А.га бериб қўйиши учун унга икки жуфт сариқ металдан ясалган аёллар билагузуги ва бир дона сариқ металдан ясалган аёллар занжирини берган.
Таъкидланишича, 14 февраль, жума куни, соат 22:30 да тезкор тадбир ўтказилган. Тадбир чоғида А.А. ва Ж.Э. А.Ш.ни ўлдирганлиги ҳақида О.Д.га хабар берган ҳамда у билан Асака шаҳридаги «Ирис» кафесида кўришган. Ёлланган икки эркак А.Ш.ни ўлдирилганлиги акс этган фотосуратни О.Д.га кўрсатган.
Шундан сўнг, аёл эрининг ўлдирилганига ишонч ҳосил қилиб, эвазига олдиндан ваъда қилинган пул қийматига тенг аёллар занжири, браслет, узуклар ва зиракни берган. Шу вақтда аёл ашёвий далиллар билан ушланган.
Мазкур ҳолат юзасидан 14 февраль куни Асака туман прокуратураси томонидан О.Д.га нисбатан Жиноят кодексининг 25 орқали 97-моддаси 1-қисми билан жиноят иши қўзғатилган. Айни пайтда аёлга нисбатан қамоққа олиш эҳтиёт чораси қўлланилган.
Аввалроқ жиззахлик эркак бошқа эркаклар билан муносабатда гумон қилиб, ўзининг ҳомиладор рафиқасини ёқиб юборган эди. Тошкентда эркак хотинини пичоқламоқчи бўлганида уни тўхтатган ИИБ ходимини жароҳатлагани ҳақида хабар берилган эди. 2020 йил 31 январь куни Самарқандда қайнука келинойисини пичоқлаб ўлдирган. Ғаллаоролда эса эрини пичоқлаган аёлга нисбатан 3 йил озодликни чеклаш жазоси тайинланган эди. Янги йил кечаси эса Тошкентда ички ишлар органи ходими ҳомиладор рафиқасини дўппослаган.
Изоҳ (0)