Маъмурий жавобгарлик тўғрисидаги кодексга тўйларни ўтказиш тартибини бузганлик учун жавобгарлик киритилиши кутилмоқда

Тўй-маросимларни ўтказиш тартибини бузганлик учун маъмурий жавобгарлик белгиланиши мумкин. Бу ҳақда 18 февраль, сешанба куни, АОКАда бўлиб ўтган «Тўй-маросимларни тартибга солиш тўғрисидаги қарорнинг жойларда ижросининг ташкил этилиши масалалари» мавзусидаги матбуот анжуманида маълум қилинди, дея хабар бермоқда «Дарё» мухбири Миролим Исажонов.

Олий Мажлис Сенатининг Ёшлар, маданият ва спорт масалалари қўмитаси раиси Бахтиёр Сайфуллаевнинг таъкидлашича, 2019 йил 14 сентябрда Олий Мажлис Қонунчилик палатаси ва Сенати Кенгашларининг «Тўйлар, оилавий тантаналар, маърака ва маросимлар ўтказилишини тартибга солиш тизимини янада такомиллаштириш тўғрисида»ги қўшма қарори қабул қилинди. Мазкур қарор ҳамда у билан тасдиқланган низом 2020йилнинг 1 январидан кучга кирди. Эндиликда оилавий тадбирлар белгиланган қатъий талаблар асосида ўтиши лозим.

«Вазирлар Маҳкамаси томонидан тўй ва маросимларни ўтказиш тартибини бузганлик учун маъмурий жавобгарлик белгилашни назарда тутувчи «Ўзбекистон Республикасининг Маъмурий жавобгарлик тўғрисидаги кодексига қўшимчалар киритиш ҳақида»ги қонун лойиҳаси тайёрланиб, Қонунчилик палатасига киритилган. Улар қонун лойиҳасини тез кунларда Сенатга беради ва у Сенатда тасдиқланади. Лойиҳада тўй, оилавий тантаналар ва маъракалар ўтказиш тартибини бузган шахслар ҳамда маросим ўтказилган жой эгалари жаримага тортилиши белгиланган.

Тартибни бузганлар жазосиз қоладиган бўлса, барибир яна ўша дабдабали маросимлар ўтказишда давом этаверади. Қўшма қарорга асосан, тасдиқланган низом барчага баробар. Биз низом бўйича иш олиб борамиз. Кодекс тасдиқлангач, тартибни бузганларнинг ҳаммаси — у ҳоким бўладими, оддий ишчими ёки санъаткорми, ким бўлишидан қатъи назар, жавобгарликка тортилади. Олий Мажлис Қонунчилик палатаси ва Сенати Кенгашларининг қўшма қарори — бу қонунга тенг. Шу қонун бўйича ҳам иш юритилади. Унга бир қатор вазирлик ва идора раҳбарлари масъул», — деди Бахтиёр Сайфуллаев.

Тадбирда айтилишича, қўшма қарор ижросини таъминлаш мақсадида парламент кенгашлари Фуқароларнинг ўзини-ўзи бошқариш органлари фаолиятини мувофиқлаштириш бўйича республика кенгаши томонидан «Тўйлар, оилавий тантаналар, маърака ва маросимларни ташкил этиш ва уни ўтказишда фуқаролар йиғинлари раислари ва профилактика инспекторлари фаолиятини ташкил этиш тартиби» ишлаб чиқилди.

Шунингдек, Вазирлар Маҳкамаси ҳузуридаги Дин ишлари бўйича қўмита маълумотларига кўра, Мусулмонлар идораси Фатво бўлими томонидан 2019 йил октябрида «Тўй, маросим ва маъракаларни меъёрида ўтказиш ҳақида фатво» лойиҳаси тайёрланди.

Эслатиб ўтамиз, 2019 йил октябрида Маъмурий жавобгарлик тўғрисидаги кодексга «Тўйлар, оилавий тантаналар, маърака ва маросимлар ўтказиш тартибини бузиш» деб номланган янги моддани қўшиш тўғрисидаги қонун лойиҳаси жамоатчилик эътиборига ҳавола қилинган эди.

Агар қонун муҳокама учун эълон қилинган таҳририда қабул қилинса, у ҳолда Тўй ва маросимлар ўтказиш тўғрисидаги низомни бузган шахслар базавий ҳисоблаш миқдорининг 10 баробари (1 январь ҳолатига кўра, 2,23 миллион сўм), маросим ўтказилган жой эгалари эса 30 баробари (6,69 миллион сўм) миқдорида жаримага тортилиши мумкин.

Ўзбекистон маданият вазири ўринбосари Камола Оқилова тўйларни намунавий ўтказиш бўйича сценарийлар ишлаб чиқишни таклиф қилган эди. Кейинроқ ўша вақтдаги маданият вазири Бахтиёр Сайфуллаев ўз ўринбосарининг фикрини нотўғри деб баҳолаб, тўйларни бир хил сценарий асосида ўтказиб бўлмаслигини айтган. Собиқ сенатор Иқбол Мирзо эса дабдабали тўй қилаётганларни халқ олдида шарманда қилиш кераклигини таъкидлаган эди.

Аввалроқ Самарқандда келин-куёв дабдабали тўйдаги қарзларни тўлаш учун Россияга ишга бориб, ўша ерда ажрашиб кетгани ҳақида хабар берилган эди.