Ўзбекистон Республикаси Олий суди ва UNICEF илк бор судда ишлар кўрилаётган вақтда жабрланувчи ёки жиноят гувоҳи бўлган болаларга дўстона муҳитли хонани ташкил этди. Мазкур хона Тошкент шаҳар жиноят ишлари бўйича Шайхонтоҳур тумани судида фойдаланиш учун топширилди. Бу ҳақда UNICEF’нинг Ўзбекистондаги ваколатхонаси матбуот хизмати «Дарё»га хабар берди.
Болаларнинг ёши, етуклиги ва руҳий ҳолати эътиборга олинган ҳолда, улар ўзларини эркин ва хавфсиз сезишлари учун мазкур хона қулай муҳитни таъминлайди. Болаларга руҳий шикаст етказиш эҳтимолини имкон қадар камайтириш мақсадида хона замонавий видео ва аудио тизим билан жиҳозланган. Бундай чоралар жабрланувчи ёки жиноят гувоҳи бўлган бола суд муҳокамасида иштирок этаётганида у фақатгина судья билан гаплашиб, бошқа суд иштирокчилари билан ҳар қандай мулоқот қилишини истисно этади.
«Суд босқичида болаларга дўстона муҳитли ушбу хонанинг очилиши БМТ Бола ҳуқуқлари бўйича қўмитасининг қонун билан алоқада бўлган болаларни ҳимоя қилиш чораларини кўриш бўйича Ўзбекистонга йўллаган тавсияларини амалга оширишдаги катта қадамдир», — деди UNICEF’нинг Ўзбекистондаги ваколатхонаси раҳбари Саша Грауманн.
«Агар биз жабрланувчи ёки жиноят гувоҳи бўлган болани руҳий шикастланишдан ҳимоя қилмоқчи бўлсак, биз камида икки нарсага амин бўлишимиз керак. Биринчидан, суҳбат ёки тергов учун муҳит дўстона бўлиши керак. Иккинчидан, суд муҳокамасида бола судьядан бошқа суд жараёни ҳар қандай иштирокчилари, жумладан, айбланувчи билан мулоқотда бўлмаслиги керак», — деб таъкидлади у.
Болалар учун адолатли судловнинг халқаро стандартларига мувофиқ, жабрланувчи ва жиноят гувоҳи бўлган болалар учун барча босқичларда — судгача, судда ва суддан кейинги даврда махсус ҳимоя чоралари кўрилиши зарур. Бу шуни англатадики, қонунлар адолатли судлов жараёнида ушбу заиф болалар билан ўтказиладиган суҳбатлар сонини чеклаши лозим.
«Суд-ҳуқуқ соҳасида олиб борилаётган ислоҳотлар жараёнида Ўзбекистонда жабрланувчи ва жиноят гувоҳи бўлган болалар ҳуқуқларининг ҳимоясини янада кучайтириш борасида муҳим чора-тадбирлар амалга оширилмоқда. Бу эса, ўз навбатида, илғор халқаро тажрибага мувофиқдир», — деди Ўзбекистон Республикаси Олий суди раиси Козимжон Комилов.
Изоҳ (0)