Блогер Отабек Нуритдинов Андижон шаҳрининг Асака туманидаги Холид ибн Валид жоме масжиди яқинида спиртли ичимликлар дўкони очилгани ҳақида 18 февраль, сешанба куни, пост жойлаганидан сўнг дўкон эгалари томонидан калтакланди. Бу ҳақда блогер ўзининг Facebook’даги саҳифасида маълум қилди.
«Ушбу расмга кўзим тушиб, биринчи келган хаёл шу дўконда савдо қилаётган ва дўкон эгалари ўзимизнинг ўзбеклармикан? деб ўйладим. Асакадаги ишлаб турган Холид Ибн Валид масжиди ва Асака тумани ҳокимлиги матбуот хизматидан муносабатини кутиб қоламиз», — деб ёзган блогер ва суратларни илова қилган.
Унинг айтишича, мазкур пост эълон қилингандан чамаси 5 соат ўтгач, блогернинг уйига бир нафар аёл ва икки нафар йигит келган. Улар суратдаги ароқ дўконининг эгалари эканлиги билдириб, Отабекнинг телефон рақами ва манзилини Асака шаҳар ИИБ ходимларидан олганини айтган.
Отабек Нуритдинов уларга: «Агар ҳужжатларингизда камчиликлар бўлмаса ва менинг постимдан бирон-бир норозилигингиз бўлса, марҳамат қилиб ИИБ ходимлари ёки судга мурожаат қилинг», — деб айтган. Йигитлар эса агрессивлашиб, блогерга тан жароҳати етказиб, ўлим билан ҳам таҳдид қилган.
Маълумот учун, «Ўзбекистон Республикаси ҳудудида алкоголли ичимликлар ва пиво билан чакана савдо қилиш тўғрисида»ги Вазирлар Маҳкамасининг 1997 йил 23 октябрдаги қарорига 2-иловада «Алкоголли ичимлик ва пиволарни диний муассасалар ва масжидлар ёнида сотиш тақиқланади», деб қайд этилган.
Эслатиб ўтамиз, Отабек Нуритдинов тахаллуси остидаги андижонлик блогер Абдуфатто Нуритдинов шу йилнинг январь ойида туҳмат ва ҳақоратда айбланиб, 15 суткага қамалиб чиққанди. Блогер ўз постларида асосан Асака шаҳридаги мансабдорлар фаолиятидаги эҳтимолий коррупцион фактлар, бюджет маблағларини ўғирлаш ва талон-торож қилиш ҳолатлари ҳақида ёзган.
Изоҳ (0)