Ma’muriy javobgarlik to‘g‘risidagi kodeksga to‘ylarni o‘tkazish tartibini buzganlik uchun javobgarlik kiritilishi kutilmoqda

To‘y-marosimlarni o‘tkazish tartibini buzganlik uchun ma’muriy javobgarlik belgilanishi mumkin. Bu haqda 18-fevral, seshanba kuni, AOKAda bo‘lib o‘tgan “To‘y-marosimlarni tartibga solish to‘g‘risidagi qarorning joylarda ijrosining tashkil etilishi masalalari” mavzusidagi matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.

Oliy Majlis Senatining Yoshlar, madaniyat va sport masalalari qo‘mitasi raisi Baxtiyor Sayfullayevning ta’kidlashicha, 2019-yil 14-sentabrda Oliy Majlis Qonunchilik palatasi va Senati Kengashlarining “To‘ylar, oilaviy tantanalar, ma’raka va marosimlar o‘tkazilishini tartibga solish tizimini yanada takomillashtirish to‘g‘risida”gi qo‘shma qarori qabul qilindi. Mazkur qaror hamda u bilan tasdiqlangan nizom 2020yilning 1-yanvaridan kuchga kirdi. Endilikda oilaviy tadbirlar belgilangan qat’iy talablar asosida o‘tishi lozim.

“Vazirlar Mahkamasi tomonidan to‘y va marosimlarni o‘tkazish tartibini buzganlik uchun ma’muriy javobgarlik belgilashni nazarda tutuvchi “O‘zbekiston Respublikasining Ma’muriy javobgarlik to‘g‘risidagi kodeksiga qo‘shimchalar kiritish haqida”gi qonun loyihasi tayyorlanib, Qonunchilik palatasiga kiritilgan. Ular qonun loyihasini tez kunlarda Senatga beradi va u Senatda tasdiqlanadi. Loyihada to‘y, oilaviy tantanalar va ma’rakalar o‘tkazish tartibini buzgan shaxslar hamda marosim o‘tkazilgan joy egalari jarimaga tortilishi belgilangan.

Tartibni buzganlar jazosiz qoladigan bo‘lsa, baribir yana o‘sha dabdabali marosimlar o‘tkazishda davom etaveradi. Qo‘shma qarorga asosan, tasdiqlangan nizom barchaga barobar. Biz nizom bo‘yicha ish olib boramiz. Kodeks tasdiqlangach, tartibni buzganlarning hammasi — u hokim bo‘ladimi, oddiy ishchimi yoki san’atkormi, kim bo‘lishidan qat’i nazar, javobgarlikka tortiladi. Oliy Majlis Qonunchilik palatasi va Senati Kengashlarining qo‘shma qarori — bu qonunga teng. Shu qonun bo‘yicha ham ish yuritiladi. Unga bir qator vazirlik va idora rahbarlari mas’ul”, — dedi Baxtiyor Sayfullayev.

Tadbirda aytilishicha, qo‘shma qaror ijrosini ta’minlash maqsadida parlament kengashlari Fuqarolarning o‘zini-o‘zi boshqarish organlari faoliyatini muvofiqlashtirish bo‘yicha respublika kengashi tomonidan “To‘ylar, oilaviy tantanalar, ma’raka va marosimlarni tashkil etish va uni o‘tkazishda fuqarolar yig‘inlari raislari va profilaktika inspektorlari faoliyatini tashkil etish tartibi” ishlab chiqildi.

Shuningdek, Vazirlar Mahkamasi huzuridagi Din ishlari bo‘yicha qo‘mita ma’lumotlariga ko‘ra, Musulmonlar idorasi Fatvo bo‘limi tomonidan 2019-yil oktabrida “To‘y, marosim va ma’rakalarni me’yorida o‘tkazish haqida fatvo” loyihasi tayyorlandi.

Eslatib o‘tamiz, 2019-yil oktabrida Ma’muriy javobgarlik to‘g‘risidagi kodeksga “To‘ylar, oilaviy tantanalar, ma’raka va marosimlar o‘tkazish tartibini buzish” deb nomlangan yangi moddani qo‘shish to‘g‘risidagi qonun loyihasi jamoatchilik e’tiboriga havola qilingan edi.

Agar qonun muhokama uchun e’lon qilingan tahririda qabul qilinsa, u holda To‘y va marosimlar o‘tkazish to‘g‘risidagi nizomni buzgan shaxslar bazaviy hisoblash miqdorining 10 barobari (1-yanvar holatiga ko‘ra, 2,23 million so‘m), marosim o‘tkazilgan joy egalari esa 30 barobari (6,69 million so‘m) miqdorida jarimaga tortilishi mumkin.

O‘zbekiston madaniyat vaziri o‘rinbosari Kamola Oqilova to‘ylarni namunaviy o‘tkazish bo‘yicha ssenariylar ishlab chiqishni taklif qilgan edi. Keyinroq o‘sha vaqtdagi madaniyat vaziri Baxtiyor Sayfullayev o‘z o‘rinbosarining fikrini noto‘g‘ri deb baholab, to‘ylarni bir xil ssenariy asosida o‘tkazib bo‘lmasligini aytgan. Sobiq senator Iqbol Mirzo esa dabdabali to‘y qilayotganlarni xalq oldida sharmanda qilish kerakligini ta’kidlagan edi.

Avvalroq Samarqandda kelin-kuyov dabdabali to‘ydagi qarzlarni to‘lash uchun Rossiyaga ishga borib, o‘sha yerda ajrashib ketgani haqida xabar berilgan edi.